విజయవాడ, ఫిబ్రవరి 15: కాపు రిజర్వేషన్‌కు సంబంధించి కేంద్రంలోని సిబ్బంది మంత్రిత్వశాఖ (డీఓపీటీ) అభ్యంతరాలు వ్యక్తం చేసిన నేపథ్యంలో తెలుగుదేశం పార్టీకి చెందిన కాపు నేతలతో ముఖ్యమంత్రి చంద్రబాబు నాయుడు గురువారం వీడియో కాన్ఫరెన్స్ నిర్వహించారు. కాపు రిజర్వేషన్లపై ఆందోళన అవసరం లేదని స్పష్టం చేశారు. రాజ్యాంగంలోని తొమ్మిదవ షెడ్యూలు సవరించి రిజర్వేషన్లు కల్పించాలని కోరామని కాపు నేతలకు వివరించారు.

శ్రీకాళహస్తి, ఫిబ్రవరి 15: స్కంద రాత్రి సందర్భంగా గురువారం ఉదయం శ్రీకాళహస్తీశ్వర స్వామి అధికారనందిపై ఊరేగుతూ భక్తులను అనుగ్రహ ప్రదానం చేశారు. మహాశివరాత్రి బ్రహ్మోత్సవాల్లో భాగంగా గురువారం స్కంద రాత్రి ఉత్సవం జరిగింది. ఉదయం గంగాదేవీ సమేతుడైన సోమస్కందమూర్తి అధికార నంది వాహనంపైన అధిరోహించారు. జ్ఞానప్రసూనాంబ కోరిన వరాలిచ్చే కామధేనువు వాహనంపై అధిష్ఠించి భక్తులకు అభయప్రదానం చేశారు.

ఏలూరు, ఫిబ్రవరి 15: కొల్లేరులో సహజసిద్ధంగా లభించే చేపలు పట్టుకోవడానికి ఒక మత్స్యకారుడి నుంచి రూ.30వేలు లంచం తీసుకుంటున్న పశ్చిమగోదావరి జిల్లా ఏలూరు అటవీ శాఖ డివిజన్ అభయారణ్య బీట్ ఆఫీసర్ కె శ్రీకాంత్‌ను గురువారం అవినీతి నిరోధక శాఖ (ఏసీబీ) అధికారులు రెడ్‌హ్యాండెడ్‌గా పట్టుకున్నారు. అతని వద్ద నుంచి లంచం సొమ్ము స్వాధీనం చేసుకుని అరెస్టు చేశారు.

విజయవాడ, ఫిబ్రవరి 15: రాష్ట్రంలోని జిల్లా ట్రెజరీ కార్యాలయాల నుంచి పెన్షన్‌కు అనుమతి పొందటమా... అయ్య బాబోయ్ అంటూ అదిరిపడుతున్నారు పదవీ విరమణ చేసిన ఉద్యోగులు. ఇక్కడ సిఫార్సులతో సంబంధం లేదు. ఏకంగా అదీ నేరుగా డబ్బుతో మాత్రమే పనులు జరుగుతున్నాయని వారు ఆవేదన వ్యక్తం చేస్తున్నారు. రాష్ట్రంలోని అన్ని జిల్లాలలో ట్రెజరీ పెన్షన్ విభాగాలలో రిటైరైన ఉద్యోగులకు తిప్పలు తప్పటం లేదు.