నందికొట్కూరు, సెప్టెంబర్ 9: శ్రీశైలం జలాశయానికి వరద నీరు రావడంతో హంద్రీనీవాకు శనివారం నీరు విడుదల చేశారు. శ్రీశైలం నీటిమట్టం 816 అడుగులకు చేరడంతో కర్నూలు జిల్లా మల్యాల సమీపంలో ని హంద్రీనీవా మొదటి ఎత్తిపోతల పథకం ఒక పంపు ద్వారా 350 క్యూసెక్కుల నీటిని అధికారులు విడుదల చేశారు. శ్రీశైలానికి చేరే నీటిని బట్టి మిగతా పంపుల ద్వారా నీరు విడుదల చేస్తామని అధికారులు తెలిపారు.

విజయవాడ, సెప్టెంబర్ 9: రాష్ట్రంలో ఇసుక రవాణాలో చోటు చేసుకున్న అక్రమాలపై ముఖ్యమంత్రి చంద్రబాబు నాయుడు తీవ్ర ఆగ్రహం వ్యక్తం చేశారు. పరిస్థితిలో మార్పులేకపోతే, తాను రీచ్‌ల్లో తనిఖీలు చేస్తానని అధికారులకు స్పష్టం చేశారు. వెలగపూడి సచివాలయంలో శనివారం జరిగిన మంత్రివర్గ సమావేశంలో ఇసుక విధానం, రవాణా తదితర అంశాలపై చోటు చేసుకుంటున్న ఆరోపణలపై చర్చ జరిగింది.

మడకశిర, సెప్టెంబర్ 9: కర్నాటక రాజధాని బెంగళూరులో ఉద్యోగ పరీక్షలు రాయడానికి వెళ్లిన తెలుగు రాష్ట్రాల విద్యార్థులపై కన్నడ సంఘాలు దాడికి పాల్పడటం బాధాకరమని, విద్యార్థులకు రక్షణ కల్పించాలని కర్నాటక హోంమంత్రి రామలింగారెడ్డికి పిసిసి చీఫ్ ఎన్ రఘువీరారెడ్డి సూచించారు. విద్యార్థులపై దాడి జరిగినట్లు తెలియగానే ఆయన మంత్రి రామలింగారెడ్డికి ఫోన్ చేశారు.

విజయవాడ, సెప్టెంబర్ 8: నగదు రహిత విశాఖ కార్యక్రమాన్ని అక్టోబర్ 9 నుంచి ప్రారంభించనున్నట్టు వీసా కంపెనీ ప్రతినిధులు శుక్రవారం రాష్ట్ర ఐటి శాఖ మంత్రి నారా లోకేష్‌కు తెలిపారు. వెలగపూడి సచివాలయం నుంచి వీసా కంపెనీ ప్రతినిధులతో మంత్రి వీడియో కాన్ఫరెన్సు ద్వారా నగదు రహిత విశాఖ అమలుపై సమీక్ష నిర్వహించారు.