అమరావతి, జూలై 14: అభ్యుదయ కవితా పితామహుడు గురజాడ అప్పారావు రచించిన కన్యాశుల్కం నాటకం ప్రదర్శన 125 ఏళ్లు పూర్తిచేసుకున్న సందర్భంగా జాతీయ ఉత్సవాలు నిర్వహించాలని రాష్ట్ర ప్రభుత్వం నిర్ణయించింది. వచ్చే నెల 26, 27 తేదీల్లో నిర్వహించే కన్యాశుల్కం నూట పాతికేళ్ల జాతీయ ఉత్సవాలకు విశాఖపట్నం వేదిక కానుంది. 1892లో తొలిసారి ప్రదర్శించిన కన్యాశుల్కం నాటకం సరిగ్గా ఈ ఏడాది 125 ఏళ్లు పూర్తిచేసుకుంది.

విజయనగరం, జూలై 14: ఇక్కడి రాజీవ్ గాంధీ స్టేడియంలో ఆర్మీ రిక్రూట్‌మెంట్ ర్యాలీ అక్టోబర్ 6న నిర్వహించనున్నట్టు ఆర్మీ రిక్రూటింగ్ ఆఫీసర్ కల్నల్ శశాంక్ వర్మ తెలిపారు. శుక్రవారం కలెక్టరేట్‌లో ఏర్పాటు చేసిన సమావేశంలో ఆయన మాట్లాడుతూ ఆర్మీలో సుమారు 400 నుంచి 500 ఖాళీలు ఉన్నాయన్నారు. వాటిని భర్తీ చేసేందుకు ఆర్మీ రిక్రూట్‌మెంట్ ర్యాలీ నిర్వహించనున్నట్లు స్పష్టం చేశారు.

తిరుపతి, జూలై 14: తిరుపతి రైల్వే డివిజన్ ఏర్పాటు సాధ్యం కాదని దక్షిణమధ్య రైల్వే బోర్డు చైర్మన్ ఎకె మిట్టల్ తేల్చి చెప్పారు. శుక్రవారం తిరుపతికి విచ్చేసిన ఆయన తిరుపతి రైల్వేస్టేషన్లో జరుగుతున్న అభివృద్ధి పనులను పరిశీలించారు. అనంతరం ఆయన విలేఖరులతో మాట్లాడుతూ గుంతకల్ డివిజన్ పనితీరు బాగుందని ఈక్రమంలో తిరుపతి రైల్వే డివిజన్ ఏర్పాటు చేయాల్సిన అవసరం కనిపించడంలేదని అన్నారు.

విజయవాడ, జూలై 14: తమ కార్పొరేషన్‌కు 14 సంవత్సరాల తరువాత ముఖ్యమంత్రి చంద్రబాబు నాయుడు ప్రభుత్వం నిధులు మంజూరు చేసిందని కల్లుగీత కోపరేటివ్ ఫైనాన్స్ కార్పొరేషన్ చైర్మన్ తాతా జయప్రకాష్ నారాయణ చెప్పారు. సచివాలయం 4వ బ్లాక్ పబ్లిసిటీ సెల్‌లో శుక్రవారం మధ్యాహ్నం ఆయన మీడియాతో మాట్లాడారు. 2003-04 ఆర్థిక సంవత్సరం తరువాత మళ్లీ ఇప్పుడు మాత్రమే విడుదల చేశారన్నారు.