అమరావతి, జూలై 13: విద్యుత్ శాఖ వివిధ పద్దుల కింద తీసుకున్న రుణాల వడ్డీ రేట్లు తగ్గించుకునేందుకు అవసరమైన చర్యలు తీసుకోవాలని రాష్ట్ర ప్రభుత్వ ప్రధాన కార్యదర్శి దినేష్‌కుమార్ ఆ శాఖ అధికారులను ఆదేశించారు. గురువారం సచివాలయంలో విద్యుత్ శాఖ అధికారులతో ఆయన సమీక్షా సమావేశం నిర్వహించారు. ఈ సమావేశంలో విద్యుత్ శాఖ ప్రధాన కార్యదర్శి అజయ్ జైన్, జెన్కో ఎండి విజయానంద్‌తో సహా పలువురు అధికారులు పాల్గొన్నారు.

ఏలూరు, జూలై 13: రాష్ట్రంలో కాపునేత ముద్రగడ పద్మనాభం తలపెట్టిన పాదయాత్రకు అనుమతి లేదని రాష్ట్ర డిజిపి ఎన్ సాంబశివరావు స్పష్టం చేశారు. ఈపరిస్థితుల్లో యువతరం అప్రమత్తంగా ఉండి కేసుల్లో ఇరుక్కోకుండా భవిష్యత్‌ను కాపాడుకోవాలని ఆయన హితవు పలికారు. ఏలూరు రేంజ్ పరిధిలో శాంతిభద్రతలు, ఇతర అంశాలపై గురువారం పశ్చిమగోదావరి జిల్లా ఏలూరులో ఆయన మూడు జిల్లాల పోలీసు అధికారులతో సమావేశమయ్యారు.

విశాఖపట్నం (జగదాంబ) జూలై 13: టెన్త్ అడ్వాన్స్‌డ్ సప్లిమెంట్ పరీక్షా ఫలితాలను మానవ వనరుల శాఖ మంత్రి గంటా శ్రీనివాసరావు విశాఖలో గురువారం విడుదల చేశారు. సప్లిమెంట్ పరీక్షలకు 46,605 మంది హాజరుకాగా, 33,221 మంది ఉత్తీర్ణులై 71.37 శాతం సాధించినట్టు తెలిపారు. ఫలితాల్లో 94.38 శాతంతో నెల్లూరు జిల్లా ప్రధమ స్థానంలో నిలవగా, 60.17 శాతంతో కృష్ణా జిల్లా చివరి స్థానంలో నిలిచింది.

విశాఖపట్నం, జూలై 13: ఉత్తర బంగాళాఖాతంలో 7.6 కిలోమీటర్ల పైన ఉపరితల ఆవర్తనం ఏర్పడిందని విశాఖ తుపాను హెచ్చరికల కేంద్రం అధికారులు గురువారం రాత్రి తెలిపారు. దీని ప్రభావంతో రాగల 24 గంటల్లో కోస్తాలో అక్కడక్కడ ఒక మోస్తరు వర్షాలు కురిసే అవకాశం ఉందన్నారు.