కాకినాడ, ఏప్రిల్ 28: ఎపి ఎంసెట్-2017 అగ్రికల్చర్, మెడిసిన్ పరీక్షలు శుక్రవారం తెలుగు రాష్ట్రాల్లో ప్రశాంతంగా జరిగాయి. ఉదయం 10 గంటల నుండి మధ్యాహ్నం ఒంటిగంట వరకు, మధ్యాహ్నం 2.30నుండి సాయంత్రం 5.30 గంటల వరకు పరీక్షలు నిర్వహించారు. 80వేల 843 మంది అభ్యర్ధులు ఈ పరీక్షలకు హాజరు కావల్సి ఉండగా, 75వేల 381 మంది హాజరయ్యారు. 5462 మంది గైర్హాజరు కాగా 93.24 శాతం హాజరు లభించింది.

విజయవాడ, ఏప్రిల్ 28: ఇసుక మాఫియా రోజురోజుకు రెచ్చిపోతోందని, అన్ని నదులను మాఫియా తవ్వేస్తోందని కేంద్ర మాజీ మంత్రి, బిజెపి మహిళా మోర్చా ఇన్‌ఛార్జ్ పురంధ్రీశ్వరి అన్నారు. ఆమె శుక్రవారం మీడియాతో మాట్లాడుతూ ఓవైపు ఉచిత ఇసుక అంటున్నారని, మరోవైపు లారీలతో అమ్మి సొమ్ము చేసుకుంటున్నారని విమర్శించారు. చిత్తూరు జిల్లా ఏర్పేడు ఘటనలో 16 మంది మృతి చెందడం బాధాకరమన్నారు.

విజయవాడ, ఏప్రిల్ 28: ప్రభుత్వం అమలు చేస్తున్న సంక్షేమ, అభివృద్ధి కార్యక్రమాలను మరింతగా ప్రజలలోకి తీసుకువెళ్లి, ప్రజల్లో అవగాహన పెంపొందించడంలో సమాచార శాఖ కీలకమైన బాధ్యతలను నిర్వర్తించాల్సి వుందని రాష్ట్ర సమాచార పౌర సంబంధాల శాఖ మంత్రి కాలువ శ్రీనివాసులు చెప్పారు.

విజయవాడ(బెంజిసర్కిల్), ఏప్రిల్ 28: ఎన్నికల సమయంలో వెయ్యి హామీలను ఇచ్చిన తెలుగుదేశం పార్టీ అధికారంలోకి వచ్చిన తరువాత ఒక్కహామీని కూడా అమలు చేయలేదని వైఎస్‌ఆర్ కాంగ్రెస్ పార్టీ శాసనసభా పక్ష ఉపనేత పెద్దిరెడ్డి రామచంద్రారెడ్డి విమర్శించారు. శుక్రవారం నగరంలోని పార్టీ కార్యాలయంలో ఏర్పాటు చేసిన విలేఖరుల సమావేశంలో ఆయన మాట్లాడుతూ రాష్ట్రంలో రైతులకు అన్ని విధాలా అన్యాయం జరుగుతోందన్నారు.