హైదరాబాద్: ఈ నెల 12 నుంచి ఎపిలో జరిగే కృష్ణా పుష్కరాలకు రావాల్సిందిగా సినీనటుడు జూనియర్ ఎన్టీఆర్‌ను మంత్రి పల్లె రఘునాథ రెడ్డి ఆహ్వానించారు. ఆయన గురువారం ఎన్టీఆర్‌ను కలిసి ప్రభుత్వం తరఫున ఆహ్వానపత్రిక అందజేశారు.

విజయవాడ: కృష్ణా పుష్కరాల సందర్భంగా ఈ రోజు సాయంత్రం 5 గంటలకు ఇబ్రహీంపట్నం నుంచి పవిత్ర సంగమం వరకు శోభాయాత్ర కొనసాగనుంది. ఈ సందర్భంగా వివిధ సాంస్కృతిక కార్యక్రమాలను నిర్వహిస్తున్నారు. రాత్రి 8.15 గంటలకు సీఎం చంద్రబాబు పవిత్ర సంగమం వద్ద నమూనా దేవాలయాలను ప్రారంభిస్తారు. సీఎం ప్రసంగించిన అనంతరం లేజర్‌షో ప్రదర్శించనున్నారు. కృష్ణా హారతి కార్యక్రమాన్ని దీపం వెలిగించి చంద్రబాబు ప్రారంభిస్తారు.

కర్నూలు: మావోయిస్టులతో సంబంధాలున్నాయన్న అనుమానంతో ముగ్గురు వ్యక్తులను అవుకు మండలం రామవరం వద్ద గురువారం ఉదయం పోలీసులు అదుపులోకి తీసుకున్నారు. వీరు స్థానికంగా ఓ ఇరిగేషన్ ప్రాజెక్టులో కూలీలుగా పనిచేస్తూ మావోయిస్టులక సహకరిస్తున్నట్లు సమాచారం. బుగ్గ వద్ద ఓ ప్రైవేటు అతిథిగృహంలో ఈ ముగ్గురినీ పోలీసు అధికారులు విచారిస్తున్నారు.

ముత్తుకూరు, ఆగస్టు 10: నెల్లూరు జిల్లా ముత్తుకూరు మండలంలోని నేలటూరు గ్రామంలోని ఆంధ్రప్రదేశ్ ప్రభుత్వరంగ విద్యుత్ సంస్థ శ్రీ దామోదరం సంజీవయ్య థర్మల్ విద్యుత్ కేంద్రంలో మూడో యూనిట్‌కు సంబంధించి భూమిపూజ బుధవారం జరిగింది. ప్రాజెక్టు డైరెక్టర్ రాఘవేంద్రరావు, చీఫ్ ఇంజనీర్ చంద్రశేఖరరావు ఇంజనీర్ల బృందంతో కలిసి మూడో యూనిట్‌కు భూమిపూజ చేశారు.