విశాఖపట్నం, ఆగస్టు 6: ఉపాధి హామీ పథకం అమలులో దేశంలోనే ఆంధ్రప్రదేశ్ ఆదర్శమని కేంద్ర గ్రామీణాభివృద్ధి శాఖ సంచాలకురాలు సుపర్ణ ఎస్.పచౌరీ పేర్కొన్నారు. మూడు రోజుల పాటు విశాఖలో జరిగిన ఉపాధి హామీ పథకం పనులకు సంబంధించి ఇంటర్ స్టేట్ ఎక్సేంజ్ ప్రోగ్రామ్ ముగింపు శనివారం జరిగింది. 10 రాష్ట్రాల నుంచి వచ్చిన 38 మంది అధికారులు శ్రీకాకుళం, విజయనగరం, విశాఖ జిల్లాల్లో క్షేత్ర పర్యటనలు చేశారు.

తిరుమల, ఆగస్టు 6: ఆంధ్రప్రదేశ్ రాష్ట్రానికి ప్రత్యేకహోదా విషయంలో సానుకూలంగా ఉన్నట్టు అనిపిస్తోందని టిడిపి రాజ్యసభ సభ్యుడు టిజి వెంకటేష్ అన్నారు. హోదా విషయాన్ని అభ్యర్థించేందుకు ప్రధాని నరేంద్రమోదీని కలిసిన సందర్భంలో ఆయన ‘‘ మీ సమస్య నా సమస్య’’ అని హామీ ఇచ్చారని, ఆయన తప్పకుండా రాష్ట్రాన్ని అన్నివిధాలా ఆదుకుంటారని తమకు పూర్తి విశ్వాసం ఉందని ఆయన అన్నారు.

ఒంగోలు: శ్రీశైలం నుంచి ప్రొద్దుటూరు వెళుతున్న ఆర్టీసీ బస్సు ప్రకాశం జిల్లా గండ్లకమ్మ వద్ద అదుపు తప్పి రోడ్డుపక్కన విద్యుత్ స్తంభాన్ని బలంగా ఢీకొట్టింది. ఈ ఘటనలో గాయపడిన 20 మందిని పోలీసులు వైద్య చికిత్స నిమిత్తం మార్కాపురం ఆస్పత్రికి తరలించారు. విద్యుత్ వైర్లు బస్సుకు తగిలి ఉంటే పెను ప్రమాదం జరిగి ఉండేదని ప్రయాణీకులు చెప్పారు.

విశాఖ: అంతర్ జిల్లా నేరస్తుడు రౌతు మల్లేశ్‌తో పాటు మరో ముగ్గురు దొంగలను విశాఖ పోలీసులు శనివారం అరెస్ట్ చేశారు. వారి నుంచి పోలీసులు 317గ్రాముల బంగారం, 5.35 కిలోల వెండి, రెండు బైక్‌లు, రూ.3500 నగదును స్వాధీనం చేసుకున్నారు. ప్రధాన నేరస్తుడు మల్లేశ్‌పై అనేక జిల్లాల్లో కేసులు నమోదయినట్లు పోలీసులు తెలిపారు. వీరి కోసం ఎప్పటి నుంచో వలపన్నామని పోలీసులు వెల్లడించారు.