విజయవాడ, జూన్ 2: రాజధాని ప్రాంత అభివృద్ధి అధారిటీ (సిఆర్‌డిఏ) అధికారులతో కంబోడియా రాయబారి నవీన్ శ్రీవాత్సవ, ఉగాండాలోని భారత హై కమిషనర్ ఎవిఎస్ రమేష్‌చంద్ర గురువారం సమావేశమయ్యారు. రాజధాని అమరావతి బృహత్ ప్రణాళిక, భూ సమీకరణ విధానం, పెట్టుబడుల అవకాశాలపై చర్చించారు. అలాగే ఇక్కడ ఉపాధి అవకాశాలపై కూడా సిఆర్‌డిఏ అధికారులు పవర్ పాయింట్ ప్రజంటేషన్ ఇచ్చారు.

రాజమహేంద్రవరం, జూన్ 2: ప్రభుత్వంలోని కాపు సామాజికవర్గానికి చెందిన కొందరు పెద్దలతో చేయిస్తున్న విమర్శలు, అరెస్టులు జరుగుతాయనే బెదిరింపులకు భయపడి తమ ఉద్యమాన్ని విరమించేది లేదని కాపు ఉద్యమ నాయకుడు, మాజీ మంత్రి ముద్రగడ పద్మనాభం స్పష్టంచేశారు. కాపులను బిసిల్లో చేరుస్తానని స్వయంగా ముఖ్యమంత్రి చంద్రబాబే హామీ ఇచ్చినందున, దాన్ని నెరవేరుస్తారో, మళ్లీ రోడ్డెక్కమంటారో ఆయనపైనే ఆధారపడివుందన్నారు.

తిరుపతి, జూన్ 2: ఎస్వీ యూనివర్శిటీ గత నెల 23న రాష్ట్రంలోని 13 జిల్లాల్లో 27 సెంటర్లలో నిర్వహించిన ఎపి ఎడ్‌సెట్- 2016 పరీక్షల్లో స్ర్తి,పురుష అభ్యర్థులు పోటాపోటీగా ఉత్తీర్ణత సాధించారు. పురుషులు 96.36శాతం ఉత్తీరణ సాధించగా మహిళలు 96.06శాతం ఉత్తీర్ణత సాధించారు. గురువారం ఎస్వీయూ విసి చాంబర్‌లో విసి ఆవుల దామోదరం పరీక్ష ఫలితాలను విడుదల చేశారు.

మడకశిర, జూన్ 2 : టిడిపి అధినేత చంద్రబాబునాయుడు గత అసెంబ్లీ ఎన్నికల్లో దోషులు, ఆర్థిక నేరస్థులను పార్టీలోకి చేర్చుకుని వారితో డబ్బులు దండుకుని ఎమ్మెల్యే టికెట్లు, ఎమ్మెల్సీ పదవులు ఇచ్చారని, ప్రస్తుతం రాజ్యసభ సీట్లను కూడా అదే తరహాలో డబ్బు తీసుకుని ఇచ్చారని ప్రదేశ్ కాంగ్రెస్ కమిటీ అధ్యక్షుడు ఎన్.రఘువీరారెడ్డి ఆరోపించారు.