తిరుపతి, జూన్ 1: ఆంగ్ల భాష జోరందుకుంటున్న నేటి సమాజంలో తెలుగు నేర్చుకోవాలంటేనే తాము తక్కువ వారేమో అని భావిస్తున్న అనేకమంది కళ్లు తెరిపించేలా నాలుగేళ్ల వయసున్న వంద మంది చిన్నారులు 10 నిమిషాల్లో వంద వేమన పద్యాలను శ్రావ్యమైన కంఠంతో అలవోకగా వల్లిం చి అందరినీ విస్మయపరిచారు. ఏకకాలంలో మూడు రికార్డులను బద్దలు కొట్టారు. తిరుపతిలో మేక్ మై బేబీ జీనియస్ పాఠశాల విద్యార్థులు ఈ ఘనత సాధించారు.

శ్రీకాకుళం: ఇక్కడికి సమీపంలోని ఎచ్చెర్ల పోలీస్ శిక్షణ కేంద్రంలో బుధవారం ఇనుప స్తంభాన్ని ఏర్పాటు చేస్తుండగా విద్యుత్ తీగ తగిలి ఆదినారాయణ అనే ఎఆర్ కానిస్టేబుల్ మరణించాడు. ఇదే ఘటనలో గాయపడిన మరో కానిస్టేబుల్‌ను ఆస్పత్రిలో చేర్పించారు. కానిస్టేబుల్ మరణంతో ఎచ్చెర్ల పోలీసు క్వార్టర్స్‌లో విషాదం అలముకుంది.

విజయవాడ: రాష్ట్ర విభజన జరిగి రెండేళ్లయిన సందర్భంగా చేపట్టే నవ నిర్మాణ దీక్షలో అన్ని వర్గాల వారూ భాగస్వామ్యం కావాలని ఎపి సిఎం చంద్రబాబు పిలుపునిచ్చారు. ఆయన బుధవారం ఇక్కడ అధికారులు, ప్రజాప్రతినిధులు, ఉద్యోగ సంఘాల నేతలతో సమావేశమయ్యారు. ఈ నెల 2 నుంచి 8వ తేదీ వరకూ నవ నిర్మాణ దీక్ష కార్యక్రమంలో భాగంగా పల్లె నుంచి జిల్లా కేంద్రం వరకూ సదస్సులు నిర్వహించాలని ఆయన ఆదేశించారు.

గుంటూరు: 2014లో సమైక్యాంధ్ర ఉద్యమం సందర్భంగా రైల్‌రోకో కేసుకు సంబంధించి ఎపి వ్యవసాయశాఖ మంత్రి పత్తిపాటి పుల్లారావు, టిడిపి ఎమ్మెల్యే ఆలపాటి రాజా,మాజీ ఎమ్మెల్యేలు జియావుద్దీన్, ఈశ్వరరావు, వైకాపా నేత లేళ్ల అప్పిరెడ్డిలపై రైల్వే కోర్టు నాన్ బెయిలబుల్ అరెస్టు వారంట్లను బుధవారం జారీ చేసింది.