అనంతపురం, కడప జిల్లాల్లో సోమవారం వడదెబ్బకు ఐదుగురు మృతిచెందారు. కడప జిల్లా నందలూరులో కత్తికట్టు జయరామ్ (43), రైల్వేకోడూరు మండలం బయనపల్లెకు చెందిన కె సుబ్బరాయుడు (65), అనంతపురం జిల్లా పెదపప్పూరు మండలం తబ్జుల గ్రామానికి చెందిన నాగిరెడ్డి (70), ఓబులదేవరచెరువు మండలం తంగేడుకుంట గ్రామానికి చెందిన షేక్‌హుస్సేన్ (11), గోరంట్లకు చెందిన వెంకటేశు (55) వడదెబ్బకు ప్రాణాలు కోల్పోయారు.

తెనాలి, మే 2: గుంటూరు జిల్లా తెనాలిలోని పప్పుల మిల్లుల్లో జోనల్ ఫుడ్ కంట్రోలర్ ఎన్ పూర్ణచంద్రరావు ఆధ్వర్యంలో ప్రత్యేక బృందం సోమవారం తనిఖీలు నిర్వహించి 220 బస్తాల నిషిద్ధ కెమికల్స్ పౌడర్‌ను సీజ్ చేశారు. జిఎఫ్‌ఓ పూర్ణచంద్రరావు కథనం ప్రకారం.. తెనాలి పరిసర ప్రాంతాల్లోని పప్పుల మిల్లుల్లో ప్రభుత్వం నిషేధించిన సిల్కా, గ్లాసి, సోమ్ రకాల పౌడర్లను పప్పుల నిల్వలకు వాడుతున్నట్లు వారికి సమాచారం అందింది.

విజయవాడ: నగరంలోని పాత ప్రభుత్వాసుపత్రిలో మూడు రోజుల శిశువు అనుమానాస్పదంగా మరణించడంపై సమగ్ర విచారణ జరపాలని వైద్య,ఆరోగ్య శాఖామంత్రి కామినేని శ్రీనివాస్ ఆదేశించారు. ఈ సంఘటన గురించి తెలిశాక లండన్‌లో ఉన్న ఆయన ఆస్పత్రి వైద్యులతో ఫోన్‌లో మాట్లాడారు. శిశువుమృతిపై స్థానిక కాంగ్రెస్, వైకాపా నేతలు ఆగ్రహం వ్యక్తం చేశారు. ఈ ఘటనకు బాధ్యులైన ఆస్పత్రి ఉద్యోగులపై కఠిన చర్యలు తీసుకోవాలని డిమాండ్ చేశారు.

విజయవాడ: కొన్ని శాఖల్లో ఖాళీగా ఉన్న సుమారు 400 ఉద్యోగాలను భర్తీ చేసేందుకు ఎపి మంత్రిమండలి అనుమతి మంజూరు చేసింది. ఇప్పటికే 20వేల ఉద్యోగాలను భర్తీ చేయాలని ప్రభుత్వం నిర్ణయించింది. వీటన్నింటికీ కలిపి త్వరలో నోటిఫికేషన్లు జారీ చేసే అవకాశం ఉంది.