నెల్లూరు: జిల్లాలోని గూడూరు ప్రాంతంలో పలు చోరీలకు పాల్పడిన అంతర్రాష్ట్ర దొంగల ముఠాలోని ఆరుగురు సభ్యులను పోలీసులు అరెస్టు చేశారు. వీరు తమిళనాడుకు చెందినవారని, ఈ ముఠాపై గతంలో పలు కేసులు నమోదయ్యాయని పోలీసులు తెలిపారు. వీరి నుంచి 25 లక్షల రూపాయలు విలువచేసే బంగారు నగలు, రెండు లక్షల రూపాయలు వెండి వస్తువులను స్వాధీనం చేసుకున్నారు.

విజయవాడ: నియోజకవర్గం అభివృద్ధి చెందాలన్న ఆకాంక్షతోనే టిడిపిలో చేరుతున్నానని బొబ్బిలి ఎమ్మెల్యే సుజయకృష్ణ రంగారావు బుధవారం ఇక్కడ తెలిపారు. డబ్బులు ఇవ్వడం వల్లే వైకాపా ఎమ్మెల్యేలు టిడిపిలో చేరుతున్నారన్న ఆరోపణల్లో నిజం లేదన్నారు. వైకాపాలో బొత్స సత్యనారాయణ చేరడం వల్లే తాను ఆ పార్టీని వీడుతున్నానన్న వాదన అవాస్తవమన్నారు.

రాజమండ్రి: ఇటీవల స్థానికంగా సంచలనం సృష్టించిన సామూహిక అత్యాచారం కేసులో ప్రేమ్‌కుమార్, సతీష్, మణికంఠ అనే ముగ్గురు నిందితులను అరెస్టు చేసినట్లు పోలీసులు బుధవారం తెలిపారు. పరారీలో ఉన్న మరో నిందితుడు పలివెల రాజు అనే నిందితుడి కోసం గాలిస్తున్నారు. మహిళపై సామూహిక అత్యాచారానికి పాల్పడినట్లు ముగ్గురు నిందితులు పోలీసులకు తెలిపారు. ఈ నలుగురు నిందితులపైన ఇదివరకే రౌడీషీట్లు ఉన్నాయి.

ఏలూరు: పట్టణ శివారులో ఓ ప్రైవేటు వైద్యకళాశాల సమీపంలో బుధవారం ఉదయం మితిమీరిన వేగంతో వస్తున్న లారీ ఓ కారును, ఎడ్లబండిని ఢీకొనడంతో ముగ్గురు మరణించారు. గాయపడిన ముగ్గురిని ఆస్పత్రికి తరలించారు. ప్రమాదంలో రెండు ఎద్దులు మరణించాయి.