హైదరాబాద్: అనుకున్న సమయం కంటే ముందుగానే పట్టిసీమ ప్రాజెక్టును పూర్తి చేశామని, ఈ ప్రాజెక్టు వల్ల గోదావరి జిల్లాలకు నష్టం కలుగుతుందన్న అపోహలు అర్థం లేనివని సిఎం చంద్రబాబు మంగళవారం అసెంబ్లీ సమావేశంలో అన్నారు. పట్టిసీమపై వైకాపా తప్పుడు ప్రచారం చేసిందన్నారు. నదుల అనుసంధానాన్ని చేతల్లో చూపించిన ఘనత తమకే దక్కిందన్నారు.

హైదరాబాద్: వైకాపాను వీడాలా? వద్దా? అనే సంశయానికి ఆ పార్టీ ఎమ్మెల్యే జ్యోతుల నెహ్రూ ఎట్టకేలకు తెర దించారు. పార్టీ ప్రాథమిక సభ్యత్వానికి రాజీనామా చేస్తున్నట్లు ఆయన మంగళవారం ప్రకటించారు. ఈ మేరకు పార్టీ అధినేత వైఎస్ జగన్‌కు నెహ్రూ ఓ లేఖను పంపారు. ‘మీరు చెప్పినట్లు నడుచుకోలేక పోతున్నందుకు రాజీనామా చేస్తున్నాన’ని ఆయన పేర్కొన్నారు.

హైదరాబాద్: భూమా నాగిరెడ్డి తిరిగి టిడిపిలో చేరాక ఇపుడు మళ్లీ ఫ్యాక్షన్ రాజకీయాలు మొదలైనట్లు మాజీ మంత్రి శిల్పా మోహన్ రెడ్డి అన్నారు. తన వర్గానికి చెందిన సర్పంచ్ తులసిరెడ్డిపై మంగళవారం రాత్రి కత్తులతో దాడి జరిగిందని, ఈ ఘటనకు భూమా కారకుడని ఆయన ఆరోపించారు. తులసిరెడ్డి కుటుంబ సభ్యులను వెంటబెట్టుకుని శిల్పా మోహన్‌రెడ్డి సోదరులు ఈరోజు పార్టీ అధినేత చంద్రబాబును కలిశారు.

కర్నూలు: కొత్తపల్లి సర్పంచ్, టిడిపి నాయకుడు తులసిరెడ్డిపై సోమవారం రాత్రి ఆయన ఇంటి ఆవరణలో గుర్తు తెలియని వ్యక్తులు కత్తులతో దాడి చేశారు. ఆయన ఫోన్‌లో మాట్లాడుతుండగా దుండగులు ప్రవేశించి కళ్లలో కారం చల్లి కత్తులతో గాయపరిచారు. వెంటనే ఆయనను తొలుత కర్నూలు ఆస్పత్రికి ఆ తర్వాత హైదరాబాద్‌కు తరలించారు. ఆయనకు ప్రాణాపాయం తప్పిందని, బాగా రక్తస్రావం కావడంతో నీరసించిపోయారని తెలిసింది.