హైదరాబాద్, మార్చి 24: ఆంధ్రప్రదేశ్‌లో ఎస్‌సి, ఎస్‌టిల అభ్యున్నతికి ప్రత్యేక ప్రణాళికలను రూపొందించి 2016-17 సంవత్సరం నుండి అమలు చేయాలని ముఖ్యమంత్రి చంద్రబాబు అధికారులను ఆదేశించారు. దళితులు, గిరిజనుల సంక్షేమంపై గురువారం ఆయన సచివాలయంలో సమీక్షా సమావేశం నిర్వహించారు. దళితులు, గిరిజనులు సమాజంలోని ఇతర వర్గాలతో సమానంగా ఎదిగేలా ప్రత్యేక చర్యలు తీసుకోవాలని సూచించారు.

ఒంగోలు: బంధువుల ఇంట్లో కర్మకాండకు హాజరై వెళుతుండగా కారు బోల్తాపడి నలుగురు మరణించిన ఘటన అద్దంకి మండలం చిన్నకొత్తపల్లి వద్ద గురువారం మధ్యాహ్నం జరిగింది. నెల్లూరు జిల్లా గూడురుకు చెందిన అయిదుగురు వ్యక్తులు గుంటూరు జిల్లా శ్రీరాంపురంలో కర్మకాండకు హాజరయ్యారు. తిరుగు ప్రయాణంలో టైరు పేలడంతో కారు బోల్తాపడింది. సంఘటన స్థలంలో నలుగురు మృతి చెందగా, తీవ్రంగా గాయపడిన మరో వ్యక్తిని ఆస్పత్రిలో చేర్పించారు.

విజయవాడ: దేశద్రోహం కేసులో నిందితుడైన జెఎన్‌యు (దిల్లీ) విద్యార్థి సంఘం అధ్యక్షుడు కన్నయ్యకుమార్ సభ సందర్భంగా విజయవాడలో గురువారం ఘర్షణ వాతావరణం నెలకొంది. సభను జరగనివ్వమని ఓ వర్గం హెచ్చరిస్తుండగా, సభ జరిపి తీరుతామని ప్రత్యర్థి వర్గం సవాల్ విసరడంతో పరిస్థితి ఉద్రిక్తంగా మారింది. బహిరంగ సభలో ఇతరులను రెచ్చగొట్టేలా కన్నయ్య సహా ఎవరు మాట్లాడినా కేసులు నమోదు చేస్తామని పోలీసులు చెబుతున్నారు.

చిత్తూరు: శ్రీకాళహస్తి మండంలం తొండమనాడు క్రాస్‌ దగ్గర చెట్టును కారు ఢీకొంది. ఈ ఘటనలో కారులో ఉన్నఇద్దరు మహిళలు అక్కడికక్కడే మృతిచెందారు. మృతులు నెల్లూరు జిల్లా నవాబుపేటకు చెందిన వారిగా పోలీసులు గుర్తించారు.