గుంటూరు: పొన్నూరు మండలం కసుకర్రులో అమూల్య అనే ఇంజనీరింగ్ విద్యార్థిని శనివారం ఆత్మహత్య చేసుకుంది. చీరాలలోని ఓ ఇంజనీరింగ్ కళాశాలలో ఆమె చదువుతూ స్వగ్రామానికి వచ్చింది. ప్రేమ వేధింపులే తమ కుమార్తె ఆత్మహత్యకు కారణమని అమూల్య తల్లిదండ్రులు చెబుతున్నారు. పూర్తి వివరాల కోసం పోలీసులు ఆరా తీస్తున్నారు.

అనంతపురం: ఆడశిశువును గొంతు నులిమి కన్నతల్లే చంపేసిన ఘటన అనంతపురం జిల్లా హిందూపురంలో జరిగింది. ముదిరెడ్డిపల్లెకు చెందిన కళావతి, గంగాధర్ దంపతులకు ఇద్దరు ఆడపిల్లలు. మూడో కాన్పులో మగబిడ్డ పుట్టినా బతకలేదు. నాల్గో కాన్పులో మళ్లీ ఆడపిల్ల పుట్టడంతో కళావతి ఈ ఘాతుకానికి ఒడిగట్టింది. శిశువుకు వైద్యం చేయిస్తానన్న నెపంతో ఆమె హిందూపురంలోని ప్రభుత్వ ఆస్పత్రికి వచ్చింది.

అనంతపురం: కాపుగర్జన సందర్భంగా తునిలో జరిగిన విధ్వంసకాండలో వైకాపా నేత భూమన కరుణాకర రెడ్డికి ప్రమేయం ఉందా? లేదా? అనే అంశంపై సిఐడి దర్యాప్తు చేస్తోందని ఎపి హోం మంత్రి నిమ్మకాయల చినరాజప్ప శనివారం ఇక్కడ మీడియాతో అన్నారు. సిఐడి దర్యాప్తులో దోషులుగా తేలినవారిపై చట్టపరంగా శిక్షలు పడతాయన్నారు. కాగా, మాజీ మంత్రి ముద్రగడ చేస్తున్న దీక్షలను తమ ప్రభుత్వం పట్టించుకోదన్నారు.

విశాఖ: ఎపికి ప్రత్యేక హోదా, వెనుకబడిన జిల్లాలకు నిధుల కేటాయింపు వంటి అంశాలను కేంద్ర ప్రభుత్వం దృష్టికి తీసుకువెళ్లేందుకు ఎపి కాంగ్రెస్ కమిటీ ఆధ్వర్యంలో ఛలోదిల్లీ ఆందోళన చేపట్టారు. ఎపి పిసిసి అధ్యక్షుడు రఘువీరా రెడ్డి నేతృత్వంలో పలువురు కాంగ్రెస్ నేతలు, కార్యకర్తలు శనివారం విశాఖ నుంచి దిల్లీకి బయలుదేరారు.