హైదరాబాద్, ఫిబ్రవరి 1: కాపులకు బిసి కోటాలో రిజర్వేషన్లు కల్పిస్తే ఉద్యమిస్తామని జాతీయ బిసి సంక్షేమ సంఘం అధ్యక్షుడు, టిడిడి ఎమ్మెల్యే ఆర్.కృష్ణయ్య హెచ్చరించారు. రాష్ట్ర సచివాలయంలో మీడి యా ప్రతినిధులతో మాట్లాడుతూ, ప్రస్తుతం బిసిలకు లభిస్తున్న రిజర్వేషన్లలో అన్యాయం జరిగితే మిన్నకుండా ఉండేప్రసక్తే లేదన్నారు. కాపు లు ఆందోళన చేయగానే రిజర్వేషన్లు కల్పిస్తారా అంటూ ప్రశ్నించారు.

కాకినాడ, ఫిబ్రవరి 1: కాపులను బీసీలుగా గుర్తించి తక్షణం రూ.1900 కోట్లు కాపుల సంక్షేమ కార్పొరేషన్‌కు కేటాయించని పక్షంలో 5నుంచి భార్య పద్మావతితోపాటు ఆమరణ నిరాహార దీక్ష చేపడతానని మాజీ మంత్రి ముద్రగడ పద్మనాభం ప్రకటించారు. తనను అరెస్టు చేయడానికి కుట్ర జరుగుతోందని, తనను, తన భార్యను జైలులో నిర్బంధించినా అక్కడా నిరాహార దీక్ష కొనసాగిస్తామన్నారు. బెయిలు కోసం ప్రయత్నించేది లేదన్నారు.

విజయవాడ, ఫిబ్రవరి 1: కాపులకు రిజర్వేషన్లు కల్పించే విషయంలో తెలుగుదేశం ప్రభుత్వం ఎప్పటికీ కట్టుబడి ఉందని, అయితే నామమాత్రంగా కాకుండా చట్టబద్ధత కల్పించడమే ప్రధాన లక్ష్యమని సిఎం చంద్రబాబు స్పష్టం చేశారు. కాపులను బీసీ జాబితాలో చేర్చేందుకు ఏర్పాటు చేసిన కమిషన్‌కు సిఫార్సు చేసేందుకే జారీ చేసిన జీవో 30 ఇప్పటికీ అమల్లోనే ఉందని, ఇది ప్రభుత్వ మనోగతానికి నిదర్శనమన్నారు.

హైదరాబాద్, ఫిబ్రవరి 1: రాజకీయ స్వప్రయోజనాల కోసం సిఎం చంద్రబాబే ప్రాంతాలు, కులాలు, మతాలు, వర్గాల మధ్య విద్వేషం రెచ్చగొడుతున్నారని వైకాపా అధ్యక్షుడు, ప్రతిపక్ష నేత జగన్మోహన్ రెడ్డి దుయ్యబట్టారు. గతంలో ఏ ముఖ్యమంత్రీ లేనంతగా బాబు దిగజారి మాట్లాడుతున్నారని దుయ్యబట్టారు. బీసీలకు అన్యాయం జరగకుండా రిజర్వేషన్ల శాతం పెంచి, కాపులకు రిజర్వేషన్లు కల్పిస్తే బీసీలు ఎందుకు ఒప్పుకోరని ప్రశ్నించారు.