విజయవాడ : క్యూబిక్ మీటర్ ఇసుక ధర రూ.550లుగా నిర్ణయించామని, అధిక ధరలకు ఇసుక అమ్మితే కఠిన చర్యలు తీసుకుంటామని ఏపీ ఆర్థిక మంత్రి యనమల రామకృష్ణుడు తెలిపారు. ఆయన గురువారంనాడు ఇసుక విధానంపై కేబినేట్ సబ్‌కమిటీ సమావేశం జరిగింది. ఈ సందర్భంగా ఆయన మట్లాడుతూ ఏడాదికొకసారి ఇసుక రీచ్‌ల వారీగా వేలం నిర్వహిస్తామని వెల్లడించారు.

ఒంగోలు: సింగరాయకొండ మండలం సోమరాజుపల్లి వద్ద గురువారం ఉదయం ఓ యువకుడు వొంటిపై కిరోసిన్ పోసుకొని నిప్పంటించుకొన్నాడు. ఓ యువతితో ప్రేమ విఫలం కావడంవల్లే ఇతను ఆత్మహత్యకు యత్నించినట్లు పోలీసులు చెబుతున్నారు. తీవ్రంగా గాయపడిన యువకుడిని ఆస్పత్రికి తరలించారు.

విజయవాడ: ఎ.కొండూరు మండలం మాధవరం సమీపంలో ఓ వ్యవసాయ బావిలో పడి ముగ్గురు గొర్రెల కాపరులు మరణించిన ఘటన గురువారం ఉదయం వెలుగు చూసింది. బుధవారం సాయంత్రం దాహం తీర్చుకొనేందుకు వీరు బావి దగ్గరికి వెళ్లి ప్రమాదవశాత్తు కాలుజారి నీటిలో పడిపోయారు. ఐతే రాత్రి వీరు ఇంటికి రాకపోవడంతో గురువారం ఉదయం సమీప ప్రాంతాల్లో బంధువులు గాలించగా బావిలో మూడు మృతదేహాలను గుర్తించారు.

విజయవాడ: భవానీ భక్తుల దీక్షల విరమణ సందర్భంగా విజయవాడ ఇంద్రకీలాద్రిపై గురువారం ఉదయం నుంచి సందడి నెలకొంది. ఇరుముడులు సమర్పించేందుకు వచ్చిన భక్తుల నుంచి కొందరు అర్చకులు డబ్బులు వసూలు చేయడంతో ఘర్షణ ప్రారంభమైంది. అర్చకులను అడ్డుకునేందుకు గురుభవానీలు ప్రయత్నించడంతో ఉద్రిక్తత ఏర్పడింది.