విజయవాడ: ముఖ్యమంత్రి క్యాంపు కార్యాలయంలో ఆంధ్రప్రదేశ్‌ మంత్రివర్గ సమావేశం ముగిసింది. ముఖ్యమంత్రి చంద్రబాబునాయుడు అధ్యక్షతన సుమారు నాలుగు గంటల పాటు జరిగిన ఈ సమావేశంలో పలు అంశాలపై కేబినెట్‌ సుదీర్ఘంగా చర్చించింది. రాష్ట్రంలో ఇటీవల కురిసిన భారీవర్షాలు, వరదలు, రాజధాని నిర్మాణంతదితర అంశాలపై ఈ సమావేశంలో చర్చించినట్లు తెలుస్తోంది.

చిత్తూరు: చిత్తూరు నగర మేయర్ అనూరాధ, ఆమె భర్త హత్య కేసుకు సంబంధించి మహిళా కార్పొరేటర్ భర్త మురుగ, ప్రధాన సూత్రధారి చింటూ పి.ఏ పరంధామ, హరిదాసులను పోలీసులు అరెస్టు చేశారు. కీలక నిందితుడైన చింటూ కోసం గాలింపు చర్యలు ముమ్మరం చేశారు. తాజాగా అరెస్టు చేసిన ముగ్గురిని సోమవారం మీడియా ముందు హాజరుపరిచారు.

విశాఖ: విశాఖ జిల్లా అచ్యుతాపురంలో సోమవారం ఉదయం యలమంచిలి వైపు వెళ్తున్న ట్రాక్టర్‌ను ఎదురుగా వస్తున్న లారీ ఢీకొనడంతో ఓ వ్యక్తి మరణించాడు. ట్రాక్టర్‌లో ప్రయాణిస్తున్న మరో ఐదుగురు కూలీలు గాయపడ్డారు. క్షతగాత్రులను విశాఖ కెజిహెచ్‌కు తరలించారు.

విజయవాడ: విజయవాడ నుంచి పోలీస్ వ్యవస్థ పనితీరును కేంద్రీకృతం చేసేందుకు సోమవారం ఉదయం ఇక్కడ డీజిపి క్యాంప్ కార్యాలయాన్ని డీజిపి జె.వి.రాముడు ప్రారంభించారు. ముఖ్యమంత్రి క్యాంప్ కార్యాలయం సమీపంలోనే ఇది ప్రారంభమైంది. డీజిపి అధికారిక నివాసం కూడా రెండు నెలల క్రితమే ఇక్కడ ప్రారంభమైంది.