న్యూఢిల్లీ, జనవరి 16: పత్రికా రంగంలో విదేశీ ప్రత్యక్ష పెట్టుబడుల (ఎఫ్‌డిఐ)కున్న పరిమితిని పెంచే ప్రతిపాదనను కేంద్ర ప్రభుత్వం పరిశీలిస్తోంది. ప్రస్తుతం 26 శాతం ఎఫ్‌డిఐకి అనుమతి ఉండగా, దీన్ని 49 శాతానికి తీసుకెళ్ళాలని యోచిస్తోంది. దీనికి సంబంధించి కసరత్తును కూడా ప్రభుత్వం ప్రారంభించినట్లు తెలుస్తోంది. నిరుడు చాలా రంగాల్లో ఎఫ్‌డిఐ నిబంధనలను కేంద్రం సడలించినది తెలిసిందే.

వాషింగ్టన్, జనవరి 16: అంతర్జాతీయ ద్రవ్యనిధి (ఐఎమ్‌ఎఫ్).. సోమవారం భారత జిడిపి వృద్ధిరేటును తగ్గించింది. ప్రస్తుత ఆర్థిక సంవత్సరం (2016-17) 6.6 శాతంగానే నమోదు కావచ్చని అంచనా వేసింది. అంతకుముందు 7.6 శాతంగా ఉండొచ్చని పేర్కొనగా, పాత పెద్ద నోట్ల రద్దు నేపథ్యంలో వృద్ధిరేటు పడిపోవచ్చని అభిప్రాయపడింది. ఇటీవల ప్రపంచ బ్యాంక్ సైతం దేశ జిడిపి వృద్ధిరేటును తగ్గించినది తెలిసిందే.

ముంబయి, జనవరి 16: దేశీయ స్టాక్ మార్కెట్లు సోమవారం లాభాల్లో ముగిశాయి. బ్యాంకింగ్ షేర్లకు కొనుగోళ్ల మద్దతు లభించడంతో బాంబే స్టాక్ ఎక్స్‌చేంజ్ సూచీ సెనె్సక్స్ 50.11 పాయింట్లు పెరిగి 27,288.17 వద్ద స్థిరపడితే, నేషనల్ స్టాక్ ఎక్స్‌చేంజ్ సూచీ నిఫ్టీ 12.45 పాయింట్లు అందిపుచ్చుకుని 8,412.80 వద్ద నిలిచింది.

న్యూఢిల్లీ, జనవరి 16: పెరిగిన పెట్రోల్, డీజిల్ ధరలు గత నెల డిసెంబర్ టోకు ద్రవ్యోల్బణం (డబ్ల్యుపిఐ) గణాంకాలను పెంచాయి. 2015 డిసెంబర్‌తో పోల్చితే 2016 డిసెంబర్‌లో హోల్‌సేల్ ద్రవ్యోల్బణం 3.39 శాతానికి ఎగబాకింది. నాడు మైనస్ 1.06 శాతంగా ఉండగా, నిరుడు నవంబర్‌లో 3.15 శాతంగా ఉంది. ఈ మేరకు సోమవారం కేంద్ర వాణిజ్య మంత్రిత్వ శాఖ తెలిపింది.