మన దేశంలో ఎయిర్ ఇండియా సంస్థ దశాబ్దాల తరబడి సేవలందించడం ఆనందదాయకమైన విషయం. కానీ, ప్రస్తుతం కేంద్ర ప్రభుత్వ అనుచిత నిర్ణయాలతో పెను రుణభారాన్ని ఈ సంస్థ మోయలేక మోస్తోంది. అయిదారేళ్ళుగా మన దేశంలో విమానయానం మధ్యతరగతి వారికి కూడా అందుబాటులోనికి వచ్చింది. ప్రైవేటు విమానయాన సంస్థలతో పోటీ పడలేక- ప్రభుత్వరంగ సంస్థ అయిన ఎయిర్ ఇండియా కూలబడిపోవడం బాధాకరం.

ర్యాంకులు, మార్కులు విద్యార్థులను తీవ్రమైన ఒత్తిడిలోకి నెట్టేస్తున్నందున నేడు పలు విపరిణామాలు చోటు చేసుకొంటున్నాయి. బతకడం కోసం, విజ్ఞానం కోసం ఉపయోగపడాల్సిన చదువులు యువతను మానసిక ఒత్తిడికి గురిచేస్తున్నాయి. తాజాగా రాజస్థాన్‌లోని కోట పట్టణంలో ముగ్గురు ఐఐటీ విద్యార్థులు ఆత్మహత్య చేసుకోవడం విచారకరం. చదువులో ఒత్తిడికి లోనై వీరు బలవన్మరణాలకు పాల్పడి ప్రాణాలు విడిచారు.

దేశవ్యాప్తంగా అన్నదాతలు తరచూ రోడ్డెక్కడం బాధాకరం. గత రెండేళ్లుగా పంటలకు గిట్టుబాటు ధరలు లభించక రైతులు ఆందోళనలకు దిగుతున్నా ప్రభుత్వాలు తగిన చర్యలు తీసుకోకపోవడం దురదృష్టకరం. గత నెలలో వేలాది మంది రైతులు తమ డిమాండ్ల సాధనకు కిసాన్ ముక్తిమోర్చా పేరిట ఢిల్లీలో ప్రదర్శన నిర్వహించినా, వారి సమస్యలను పరిష్కరించడంలో కేంద్రం విఫలమైంది. నానాటికీ పెరుగుతున్న రుణభారంతో రైతు కుదేలైపోతున్నాడు.

నేడు సమాజంలో నెలకొన్న అనేకానేక సమస్యలకు పుస్తక పఠనం అలవాటు లోపించడం ఒక కారణంగా పేర్కొనవచ్చు. పుస్తక పఠనం వల్ల ఎవరైనా ప్రశాంతమైన మనస్సుతో తమ జీవితం గురించి లోతుగా ఆలోచించి, తమ సమస్యలకు సరైన పరిష్కార మార్గాలను ఎంచుకొనేవారిగా తయారవుతారు. మెదడు పనిచేసే తీరు గ్రంథ పఠనం వల్ల మెరుగవుతుంది. తమ పనులను చురుగ్గా చేసుకోగలుగుతారు. రోజుకు కనీసం అరగంట సేపు పుస్తక పఠనం చేయడం వల్ల ఏకాగ్రత పెరుగుతుంది.