అబ్బ! ఎండాకాలం వచ్చేస్తోంది.. వచ్చేసింది..’’ అనకూడదు. కాస్త మాడ్రన్‌గా అనాలి అంటే- ‘‘ఓ గాడ్! సమ్మరొచ్చేసింది!’’ అనాలి. ఇకనేం? ‘‘వేస్కో కోకోకోలా!’’ అని ఒకడనగానే- ‘‘లేదు దానికి వేళాపాళా’’ అనాలి అతవలివాడు.

ఇవాళ ఎవరైనా- ‘ఈసురోమని మనుషులుంటే’ అని అన్నా, ‘మనవాళ్లు ఉత్త వెధవాయలోయ్’- అని అనబోయినా, ఆ మాత్రం.. ఈ మాత్రం జనరల్ నాలెడ్జ్ వున్నవాడు సైతం చెంపలు ఛెళ్లు ఛెళ్లుమనిపించేస్తాడు. గత జూన్ నెలలోనే ఆంధ్రప్రదేశ్‌లోని ‘షార్’ రేంజ్ నుంచి ఒక్క రాకెట్ విసురున ఏకంగా ఇరవై శాటిలైట్స్‌ని (కృత్రిమ ఉపగ్రహాల్ని) రోదసి కక్ష్యలోనికి తీసుకుపోయి వదిలిపెట్టింది. ఆ ఇరవైలో 13 ఘనత వహించిన అమెరికా వారివి.

ఇంటిలోని పోరు ఇంతింత కాదయా..!- అన్నాడు వే మన. దేశం మొత్తం మీద అన్ని రకాలా అతి పెద్ద రాష్ట్రం- దేశానికి తొలి మహిళా ప్రధానమంత్రి ఇందిరా గాంధీని ప్రసాదించిన రాష్ట్రం గనుక అక్కడ- ఎన్నికలపై అందరి దృష్టి కేంద్రీకృతం కావడం సహజం. ఆ రాష్ట్రంలో ‘నేతాజీ’ జనాబ్ ములాయంసింగ్ యాదవ్ తన ఇంట్లో కుటుంబ వ్యవహారాలు చక్కబెట్టలేకపోయాడు. పార్టీలోని లుకలుకలు సర్దుబాటు చెయ్యలేకపోయాడు.

‘సైకిల్ పోతే పోయింది.. కొడుకు దక్కాడు’ అ నుకున్నాడు చివరికి సమాజ్‌వాద్ పార్టీ నాయకుడు, ‘నేతాజీ’ బిరుదాంకితుడు జనాబ్ ములాయం సింగ్ యాదవుడు. ‘కొడుకు సైకిల్ నీదే నాన్నా. పార్టీ ‘పిత’వు కూడా నువ్వే. కాకపోతే సైకిల్ మీద స్వారీ, పార్టీమీద పెత్తనం నాకొదిలెయ్’ అంటున్న కొడుకు అఖిలేష్ మీద కత్తులు నూరడం వల్ల లాభమేమిటి? రాజకీయాలలో గెలుపుమాట దేవుడెరుగు- కడుపు తీపి మాటేమిటి?