‘‘అబ్బో! ఇవాల్టిదా? నిన్నటిదా?? మనకి, చందమామకి అంటే- చంద్రగ్రహానికి ఉన్న అవినాభావ సంబంధం.. అసలు చంద్రుడు భూమికి సొంత బిడ్డ. మన భూమికి ఉపగ్రహం అయిన చందమామ ఆది కాలంలో గిర్రున తిరిగే భూమి గ్రహం నుంచి విడిపోయిన ఒక పెద్ద శకలం! అదే ఉపగ్రహం అయింది. అది మాతృగర్భాన్ని చీల్చుకుని బయటపడ్డ అఖాతమే. శాంత మహా సముద్రం అయింది. అబ్బో!

తొలి ఇండియన్ లేడీ బాడ్మింటన్ ప్రపంచ ఛాంపియన్ ఇంకెవరు? మన తె లుగు పిల్ల. వెంకట సింధు.. బంగారు తల్లి. మన దేశం కంటున్న నలభై ఏళ్ల కలను పీవీ సింధు నిజం చేసింది. బ్యాడ్మింటన్ ప్రపంచ ఛాంపియన్ షిప్‌ని కైవసం చేసుకొని దేశ గౌరవాన్ని తన సత్తాని ప్రపంచానికి చాటింది. మన తెలుగు పిల్లకి విరిమల్లెపూల దండ అని కీర్తించండి.. ఆడపిల్లలు షటిల్ ఆటని ప్రేమించండి.. సింధుతో మొదలైన ఈ చరిత్రని కొనసాగించండి.. జయహో!

‘సీతాపతీ చాపే గతీ’ అన్నట్లు చివరికి అనారోగ్యంతో ఉన్న సోనియా గాంధీనే మరోసారి ‘తీన్ తేరా’గా ఉన్న కాంగ్రెస్ పార్టీ పగ్గాలు ‘పట్టుకోవమ్మా!’ అంటూ బలవంతంగా అధ్యక్ష స్థానంలో నిలబెట్టారు. అది నిలబడటం కాదు- ‘కూలబడటమే’. ఇందిరా గాంధీ కుటుంబంలో పెద్ద కోడలైన సోనియాను మరోసారి రాజీ పద్ధతిలో ‘కూకోబెట్టారు’.. అన్నారు సామాన్య కార్యకర్తలు ఎందరో.

‘ఒడిశా రసగుల్లాకి జై!’ అనాల్సిన స్థితి వచ్చింది. బంగదేశ్ అనాలి - వెస్ట్ బెంగాల్ని అని మమతా దీదీ అన్నప్పటికీ- బెంగాలీలు మాత్రం పశ్చిమ బెంగాల్ అనే వ్యవహరిస్తున్నారు. అలాగే బెంగాలీవాడు ‘రాస్గుల్లా’ అంటాడు. మన తెలుగువారు రసగుల్లా అని అంటూనే ఈ స్వీటు స్పెషాలిటీని మెచ్చుకొంటారు. కాని ఒడిశావాడు మాత్రం ‘రసగోలా’అనే అంటాడు. అది గోళాకారంలో వుంటుంది- ఒక్కసారి అండాకారంలోను వుంటుంది.