హ్యూస్టన్, మార్చి 18: అమెరికాలోని హ్యూస్టన్ నగరంలో ప్రజాపనులు, ఇంజనీరింగ్ వ్యవహారాల విభాగానికి ఇండో-అమెరికన్ ఇంజనీర్ కరుణ్ శ్రీరామ అధిపతిగా వ్యవహరించనున్నారు. హ్యూస్టన్ నగర మేయర్ సిల్వెస్టర్ టర్నర్ ఆయనను ఈ పదవిలో నియమించారు. విరివిగా రాజకీయ విరాళాలు ఇచ్చే దాతగా పేరు పొందిన కరుణ్ శ్రీరామ (53) పదవీ విరమణ పొందుతున్న హ్యూస్టన్ నగర పిడబ్ల్యుఇ చీఫ్ డేల్ రుడిక్ నుంచి ఈ బాధ్యతలను స్వీకరించనున్నారు.

వాషింగ్టన్, మార్చి 17: అమెరికాలోని కాన్సాస్ రాష్ట్రంలో మార్చి 16ను ఇకనుంచి ‘ఇండియన్ అమెరికన్ అప్రిసియేషన్ డే’గా పరిగణించనున్నట్టు అక్కడి ప్రభుత్వం ప్రకటించింది. జాతి విద్వేషంతో శే్వత జాతీయుడు జరిపిన కాల్పుల్లో మరణించిన భారతీయుడు శ్రీనివాస్ కూచిభొట్ల గౌరవార్థం ఈ నిర్ణయం తీసుకున్నట్టు కాన్సాస్ గవర్నర్ శామ్ బ్రౌన్‌బ్యాక్ ప్రకటించారు.

ఫ్రీటౌన్, మార్చి 17: పశ్చిమ ఆఫ్రికాలోని సియారా లియోన్ దేశంలో 706 క్యారెట్ల భారీ వజ్రం లభించింది. వజ్రాలు అధికంగా లభించే కోనో ప్రాంతంలో క్రిస్టియన్ పాస్టర్‌గా పని చేస్తున్న ఇమానుయేల్ మోమోహ్ అనే అతనికి ఈ వజ్రం లభించింది. ఇమానుయేల్ ఈ వజ్రాన్ని దేశాధ్యక్షుడు డాక్టర్ ఎర్నెస్ట్ బాయ్ కొరోమోనోకు బహూకరించినట్లు ప్రభుత్వం ఒక ప్రకటనలో తెలియజేసింది.

బీరూట్, మార్చి 17:ఉత్తర సిరియాలోని అలెప్పో రాష్ట్రంలో శుక్రవారం సాయంత్రం ప్రార్థనలు జరుగుతున్న సమయంలో జరిగిన వైమానిక దాడుల్లో 42మంది దుర్మరణం చెందారు. అనేక మంది తీవ్రంగా గాయపడ్డారు. మృతుల్లో చాలా మంది పౌరులేనని సిరియా మానవ హక్కుల సంస్థ తెలిపింది. గుర్తు తెలియని కొన్ని యుద్ధ విమానాలే ఈ దాడులకు పాల్పడ్డాయని బ్రిటన్ కేంద్రంగా పనిచేసే ఈ సంస్థ అధినేత రామి అబ్దెల్ రహ్‌మాన్ స్పష్టం చేశారు.