సియాటిల్, జూలై 30: అమెరికాలో కాల్పుల సంస్కృతి బెంబేలిస్తూనే వుంది. తాజాగా సియాటిల్ నగరంలో జరిగిన కాల్పుల్లో ముగ్గురు మరణించగా, ఒకరు తీవ్రంగా గాయపడ్డారని నగర పోలీసులు తెలిపారు. గాయపడిన వ్యక్తిని హార్బోవ్యూ మెడికల్ సెంటర్‌కు తరలించారు. కాల్పులకు పాల్పడ్డాడని భావిస్తున్న వ్యక్తిని అదుపులోకి తీసుకున్నట్లు వారు తెలిపారు.

టర్కీ : టర్కీలోని హక్కారీ ప్రావిన్స్‌లోన ఓ ఆర్మీ బేస్‌ను కుర్దిస్థాన్‌ వర్కర్స్‌ పార్టీకి చెందిన మిలిటెంట్లు ముట్టడించేందుకు యత్నించారు. ఈ ఘటనలో 35 మంది ఉగ్రవాదులు హతమైనట్లు టర్కీ మిలిటరీ అధికారులు వెల్లడించారు. హక్కారీ ప్రావిన్స్‌లో కూడా కుర్దిష్‌ మిలిటెంట్లు, ఆర్మీ జవాన్ల మధ్య ఘర్షణ లో ఎనిమిది మంది సైనికులు మృతిచెందగా, 25 మంది గాయపడినట్లు అధికారులు తెలిపారు.

ఫిలడెల్ఫియా, జూలై 29: అమెరికాలో అధికార పక్షమైన డెమొక్రటిక్ పార్టీ నేషనల్ కనె్వన్షన్‌లో అతి చిన్న వయసు గల డెలిగేట్‌గా భారత సంతతికి చెందిన 18 ఏళ్ల యువతి శ్రుతి పలనియప్పన్ అందరి దృష్టిని ఆకర్షించారు. సెడార్ రాపిడ్స్ నుంచి ఈ కనె్వన్షన్‌కు వచ్చిన శ్రుతి హార్వర్డ్ యూనివర్శిటీలో చదువుతున్నారు. హిల్లరీ క్లింటన్‌కు ఆమె గట్టి మద్దతుదారు.

కొలంబియా: సెస్నా310 అనే ప్రైవేట్‌ విమానం ఉత్తర కాలిఫోర్నియాలోని విమానాశ్రయంలో ల్యాండ్‌ అవుతూండగా పక్కకు ఒరిగిపోవడంతో మంటలు వ్యాపించాయని అధికారులు వెల్లడించారు. విమానంలోని నలుగురు ప్రయాణికులు మృతిచెందారు. సిబ్బంది వచ్చి మంటలు అదుపుచేసేలోపే విమానం పూర్తిగా కాలిపోయినట్లు పేర్కొన్నారు.