వాషింగ్టన్/ కాబూల్, మే 22: ఆఫ్ఘనిస్తాన్ తాలిబన్ నాయకుడు ముల్లా అఖ్తర్ మన్సూర్‌ను పాకిస్తాన్‌లోని ఓ మారుమూల ప్రాంతంలో అమెరికా డ్రోన్ హతమార్చింది. మన్సూర్‌తోపాటు మరో మిలిటెంట్‌ను లక్ష్యం చేసుకుని మానవ రహిత డ్రోన్‌ల ద్వారా శనివారం అంతం చేసినట్లు ఆఫ్ఘనిస్తాన్ నిఘా సంస్థ ఒకటి ఆదివారం ప్రకటించింది. శాంతి చర్చలకు పెద్ద అడ్డంకిగా మారిన తాలిబన్ నేత మృతి చెందటం మంచి పరిణామమని అమెరికా ప్రకటించింది.

వాషింగ్టన్, మే 21: భారత ప్రధాని నరేంద్ర మోదీకి ఘన స్వాగతం చెప్పడానికి అమెరికా ఎదురుచూస్తోంది. జూన్ 8న మోదీ యుఎస్ కాంగ్రెస్ సంయుక్త సమావేశంలో ప్రసంగించనున్నారు. ప్రధానికి రెడ్‌కార్పెట్ స్వాగతం పలికేందుకు స్పీకర్ పౌల్ రైన్ ఏర్పాట్లు చేస్తున్నారు. మోదీకి అదిరిపోయేలా విందు స్పీకర్ ఇవ్వనున్నారు. ఈ సందర్భంగా అనేక మంది నాయకులు, విదేశీ ప్రతినిధులు హాజరవుతారు.

కైరో, మే 19: పారిస్ నుంచి కైరో వెళుతున్న ఈజిప్ట్ ఎయిర్ విమానం మధ్యధరా సముద్ర ప్రాంతంలో కుప్పకూలిపోయింది. ఈ దుర్ఘటనలో 26మంది విదేశీయులు సహా 66మంది ప్రయాణికులు మరణించారు. ఈజిప్టు ఎయిర్‌స్పేస్‌లోని రాడార్ స్క్రీన్లనుంచి బయలుదేరిన కొద్ది నిమిషాలకే ఈ విమానం కనిపించకుండా పోయిందని విమానయాన అధికారులు తెలిపారు.

లండన్, మే 18: భారత స్వాతంత్య్ర సమరయోధుడు, ఆజాద్ హింద్ ఫౌజ్ వ్యవస్థాపకుడు నేతాజీ సుభాశ్ చంద్రబోస్ అదృశ్యంపై జస్టిస్ మనోజ్ ముఖర్జీ నేతృత్వంలోని విచారణ సంఘం ఇచ్చిన నివేదికలోని అంశాలు వాస్తవం కాదని 2006లో అప్పటి యుపిఎ ప్రభుత్వం తోసిపుచ్చిందని బ్రిటన్‌కు చెందిన ఒక వెబ్‌సైట్ బుధవారం వెల్లడించింది.