అంతేకానీ ఉన్నదంతా ఊడ్చిపెట్టి చేతిలో చిప్ప పట్టుకోగూడదు. ఉన్నదానిలోనే తాను తింటూ ఆ తరువాత యజ్ఞాల గురించి, దానాల గురించి ఆలోచించి చేయాలి. అడిగిన వానికంతా ఇవ్వకూడదు. అర్హత ఎరిగి దానం చేయాలి సచ్చరితా! ఎపుడైతే చేసిన దానం వల్ల సర్వమూ నష్టమవుతుందో ఆ దానాన్ని ఇవ్వకూడదు. ఒకవేళ ఇస్తానని మాట ఇచ్చినా అసలుకు నష్టం వస్తోంది కనుక దానిని కూడా ఇవ్వకూడదు. ఒక చెట్టు బాగుంటేనే కదా పూలు పండ్లు ఇవ్వగలుగుతుంది.

ఆ మహోత్సవం తరువాత అక్కడి వచ్చిన వారినందరినీ కూర్చోబెట్టి కపట వటువు విశేషాలను అడిగి తెలుసుకొన్నాడు. ఆ సమయంలో విప్రులు ఎలా ఉన్నారో అడిగి అడిగి మరీ కనుకొన్నాడు. దానాలు ఇవ్వడంలో ఏ ఏ రాజులు మేటి అని ఏమీ తెలియని అమాయకునివలె వారిని అడిగాడు. వారంతా ముక్తకంఠంతో బలి చక్రవర్తినే దానాలు ఇచ్చే మహాదాత, మహోన్నతుడని పొగిడారు.

కాలరీతిని ఎవరూ పసికట్టలేరు. కాలానికి ఎవరూ ఎదురువెళ్లలేరన్న నిజం తెలిసిన బృహస్పతి 34దేవేంద్రా! మనసును దిటవుపరుచుకో. ఎల్లవేళలా మంచినే జరుగదు. కాలవైపరీత్యాలు జరుగుతూ ఉంటాయి. నేడు బలికి బ్రాహ్మణుల ఆశీర్వాదాలు దక్కాయి. వారి దీవెనల బలం పెరిగింది. అంతేకాక భృగువంశబ్రాహ్మణులు వీనికి శక్తినిచ్చారు. శుక్రాచార్యుని ప్రియశిష్యుడైనాడు.

ఏకాదశి. విష్ణువుకు ప్రీతికరమైన రోజు. అదితి తన భర్తచేత ఉపదేశం పొందిన పయోవ్రతం నియమానుసారం చేస్తోంది. ఈ ఏకాదశి మరింత నియమంగా అదితి మొట్టమొదట తన భర్తను పూజించింది. తరువాత మహావిష్ణువు ప్రీత్యర్థం పయోవ్రతాచరణలో భాగంగా మహావిష్ణువుకు క్షీరాభిషేకం నిర్వహించింది. పాలునివేదన చేసింది. ఆ పాలనే ప్రసాదంగా తాను తీసుకొంది.