అధిక ఔషధ గుణాలు, విలువైన పోషకాలున్న మెంతికి ఆకుకూరల్లో ఓ ప్రత్యేక స్థానం ఉంది. మెంతి ఆకుల్లో పీచు, పొటాషియం, ప్రొటీన్లు, విటమిన్-సి, నియాసిన్ వంటివి పుష్కలంగా లభిస్తాయి. వంటల్లో తరచూ మెంతికూరను వాడితే రక్తంలో హానికారక కొలెస్ట్రాల్ తగ్గుముఖం పడుతుంది. బాలింతల్లో చనుబాలు పెరిగేందుకు ఇది దోహదపడుతుంది. ఆహారంలో మెంతికూర కలిపి తింటే శరీరానికి తక్షణ శక్తి అందుతుంది.

ఆకుకూరలు ప్రతిరోజూ 100 నుంచి 150 గ్రాముల వరకూ తీసుకుంటే శారీరక ఆరోగ్యం మెరుగ్గా ఉంటుందని పోషకాహార నిపుణులు చెబుతుంటారు. మనం నిత్యం వాడే తోటకూర, గోంగూర, మెంతికూర, చుక్కకూర వంటివే కాకుండా చామాకు, వామాకు, పొన్నగంటి ఆకు, గంగావాయి కూర, సిలోన్ బచ్చలి వంటివి కూడా అప్పుడప్పుడైనా వంటల్లో వాడితే రుచితో పాటు మంచి పోషకాలూ అందుతాయి. విభిన్నమైన ఈ ఆకుకూరలు మార్కెట్లో అంతగా లభించవు.

ఆకుకూరల్లో ‘రాణి’ వంటిదని తోటకూరను అభివర్ణిస్తుంటారు. దీనిలో పెరుగు తోటకూర, ఎర్ర తోటకూర, చిలక తోటకూర వంటి పలురకాలున్నాయి. ఐరన్‌తో పాటు పలు పోషక విలువలున్న తోటకూర ఆరోగ్యానికి ఎంతో మేలు చేస్తుంది. ప్రతి రోజూ కనీసం 200 గ్రాముల తోటకూరను తినాలని ఆయుర్వేద వైద్యులు సలహా ఇస్తుంటారు. దీన్ని తరచూ వంటల్లో వాడితే మొలల వ్యాధి, కడుపులో పురుగులు తగ్గుతాయి. రక్తహీనత నుంచి ఉపశమనం లభిస్తుంది.

ఐరన్, విటమిన్-ఎతో పాటు మంచి పోషకాలు ఉన్నందున తరచూ మెంతికూరను వంటల్లో వాడితే నేత్రసంబంధ సమస్యలు, చర్మవ్యాధుల బారిన పడకుండా జాగ్రత్త పడొచ్చు.మధుమేహ వ్యాధిగ్రస్తులు, నరాల జబ్బులున్నవారు దీన్ని తీసుకుంటే మంచి ఫలితంకనిపిస్తుందని వైద్యులు చెబుతుంటారు. మెంతికూరతో పప్పు, పరోటాలు, పచ్చడి, వడలు, పులుసు, పలురకాల కూరలు వండవచ్చు. వంటల్లో విరివిగా దీన్ని వాడితే శారీరక ఆరోగ్యానికి ఎంతో మేలు చేకూరుతుంది.