దిల్లీ: సిపిఐ సీనియర్ నాయకుడు ఎ.పి.బర్దన్ అస్వస్థతకు గురవడంతో ఆయనను సోమవారం ఉదయం ఇక్కడి రామ్‌మనోహర్ లోహియా ఆస్పత్రికి తరలించారు. తీవ్ర అనారోగ్యానికి గురైనట్లు గమనించిన వెంటనే కుటుంబ సభ్యులు ఆయనను ఆస్పత్రిలో చేర్పించారు.

విజయవాడ: ఎ.పి. రాజధాని అమరావతి ప్రాంతంలో స్థిర నివాసం ఏర్పాటు చేసుకొనేందుకు మంత్రులు చేస్తున్న ప్రయత్నాలు కొలిక్కి వస్తున్నాయి. నాగార్జున యూనివర్సిటీ సమీపంలో రాష్ట్ర మంత్రి పరిటాల సునీత సోమవారం ఉదయం గృహ ప్రవేశం చేశారు. ఇప్పటికే ఈ ప్రాంతంలో మంత్రి రావెల కిషోర్‌బాబు నివాసం ఏర్పాటు చేసుకున్నారు. మరి కొందరు మంత్రులు తమకు అనువైన ఇళ్ల కోసం గాలిస్తున్నారు.

విజయవాడ: టిడిపి ఆధ్వర్యంలో నిర్వహించే జన చైతన్య యాత్రలో పాల్గొనేందుకు ఆ పార్టీ అధినేత, ఎ.పి. సి.ఎం. చంద్రబాబు సోమవారం ఉదయం విజయనగరం చేరుకున్నారు. ఈ రోజు మధ్యాహ్నం ఆయన శ్రీకాకుళం జిల్లాలో పర్యటిస్తారు. టిడిపి యువనేత లోకేష్ విశాఖ జిల్లాలో జన చైతన్య యాత్రలో పాల్గొంటున్నారు.

విజయవాడ: కార్తీక మాసం చివరి సోమవారం కావడంతో ఆంధ్ర, తెలంగాణ ప్రాంతాల్లో పలు శివాలయాలు భక్తులతో కిటకిటలాడుతున్నాయి. వేకువ జాము నుంచే భక్తులు ఆలయానికి చేరుకొని అభిషేకాలు, పూజా కార్యక్రమాల్లో పాల్గొంటున్నారు. భీమవరంలోని సోమేశ్వరాలయం, శ్రీశైలం, శ్రీకాళహస్తి, పాలకొల్లు, అమరావతి, తెలంగాణలోని వేములవాడ, కీసర, కాళేశ్వరం, భద్రాచలం తదితర ఆలయాల్లో భక్తులు పోటెత్తారు.