అగ్నిదేవుడు రసహృదయుడే-9

ఫ్రాకృత మూలం
రంధణకమ్మణి ఉణిఏ మా జూరసు రత్తపాడల సు అంధం
ముహమారు అం పి అంతో ధూమా ఇసీహీణ పజ్జలఇ (్భమస్వామి)
సంస్కృత ఛాయ
రంధ కర్మనిపుణికే! మాక్రుధ్యస్వ రక్తపాటల సుగంధమ్
ముఖమారుతం పిబంధూమాయతే శిఖీన ప్రజ్వలతి!
తెలుగు వానముసురు సరసం
తే.గీ పొయ్యి మండక ముసురుకు పొగలునిండ
ఊది ఊది ఆమె పెదవులుబ్బిపోవ
మగడు జూచి ఈరీతి చమత్కరించె
‘‘అగ్నిత్రావుచుండెను నీదు అధరసుధలు’’
అసలే వానాకాలం, ముసురుపట్టింది. కట్టెలు మండక పొయ్యంతా పొగలతో నిండిపోయింది. ఊదీ ఊదీ పాపం ఆ ఇల్లాలి పెదవులుబ్బిపోయాయి. అప్పుడే వచ్చిన పతిదేవుడు ఆ దృశ్యాన్ని చూచి ‘‘అగ్ని నీ అధర సుధలను తాగాలనుకుంటున్నాడో ఏమో! అందుకే సరిగా మండడంలేదు’’ అన్నాడు.
చిలిపితనం ఉండాలేకాని ప్రతి అంశంలోను రసం చిప్పిల్లుతూనే ఉంటుంది. అట్లాగే ఈ రసికుని హృదయం ఆ రసికురాలి అధరాలు చూడగానే అగ్ని తనకు పోటీ వస్తున్నట్టు అనిపించాడు. పైగా ప్రియురాలు వానముసురు వల్ల వచ్చిన చలిని కాచుకోవడానికి ప్రియుని ఎదను ఎన్నుకోవాలి కాని ఇలా అగ్ని దగ్గరకు వెళ్లడం ఆ ప్రియుడు తట్టుకోలేక చూశావా ఈ అగ్ని నీలాంటి పడచును చూసి వూరుకొనలేకున్నాడు. అందుకే నీవు నాకు దూరం కావద్దు సుమా నేను తట్టుకోలేను అని తన భావాన్ని చిలిపికోపంతో చెబుతున్నాడు.

- ఇంకావుంది...