కిలో టమోటా మూడున్నర!

పత్తికొండ : కర్నూలు జిల్లా పత్తికొండ మార్కెట్‌లో టమోటా ధర గురువారం అమాంతం తగ్గిపోవడంతో రైతులు ఆగ్రహంతో ఊగిపోయారు. ఉదయం వరకు జత గంపలు రూ.500 పలికిన ధర మధ్యాహ్నానికి రూ.70కి పడిపోయింది. అంతకుమించి కొనుగోలు చేసేది లేదని వ్యాపారులు ఖరాకండిగా చెప్పడంతో రైతన్నలు ఆగ్రహంతో రోడ్డెక్కారు. దళారులు, వ్యాపారులు కుమ్మకై తమ పొట్టకొడుతున్నారని ఆరోపిస్తూ రహదారిపై మూడు గంటల పాటు ఆందోళన చేశారు. అధికారులు దిగొచ్చి శుక్రవారం ధర పెంచి కొంటామని చెప్పడంతో ఆందోళన విరమించారు. వివరాలు ఇలా ఉన్నాయి. క్నూలు జిల్లా పత్తికొండ టమోటా మార్కెట్‌లో వ్యాపారులు, దళారుల మాయాజాలంలో రైతులు చిక్కుకున్నారు. పత్తికొండ చుట్టుపక్కల ప్రాంతాల నుంచి టమోట పండించిన రైతులు గురువారం మార్కెట్‌కు 15 లారీల సరుకు తీసుకొచ్చారు. ఉదయం 8 గంటల నుంచి టమోటా కొనుగోళ్లు ప్రారంభమయ్యాయి. జత గంపలు(గంపలో 10 కిలోల టమోటాలు) రూ.500 చొప్పున కొనుగోలు చేశారు. అయితే 11 గంటల ప్రాంతంలో ధర పడిపోయిందని జత గంపలు రూ.70కి కొనుగోలు చేయడంతో చక్రాలకు చెందిన వ్యాపారులతో రైతులు వాగ్వివాదానికి దిగారు. వ్యాపారులు, దళారులు కలిసి ధర తగ్గించి తమ కడుపు కొట్టడం సరైన పద్దతి కాదంటూ రైతులంతా కలిసి ఆందోళన చేపట్టారు. వ్యాపారులతో వాగ్వివాదానికి దిగారు. పై మార్కెట్లో ధరలు తగ్గినందున కింది మార్కెట్‌లో ధరలు తగ్గించామని వ్యాపారులు వివరించారు. అయినా రైతులు ఆగ్రహంతో రోడ్డుపై బైఠాయించి తమకు న్యాయం చేయాలని కోరారు. సమాచారం తెలుసుకున్న రైతు సంఘం రాష్ట్ర అధ్యక్షులు రామచంద్రయ్య టమోటా మార్కెట్‌కు చేరుకుని రైతులు, వ్యాపారులు, దళారులతో మాట్లాడారు. టమోటాలు కొనుగోలు చేయాలని చెప్పినా వ్యాపారులు కొనుగోలు చేయలేదు. దీంతో మార్కెట్‌లో టమోటా విక్రయాలు ఎక్కడికక్కడే నిలిచిపోయాయి. రైతులు రోడ్డుపై బైఠాయించటంతో బెంగళూరు, మంత్రాలయం రోడ్డుపై మూడు గంటల ట్రాఫిక్ నిలిచిపోయింది. దీంతో ప్రయాణికులు ఇబ్బందులు ఎదుర్కొన్నారు. పోలీసులు జోక్యం చేసుకొని రైతులు, వ్యాపారులతో చర్చించారు. రైతులకు మద్దతుగా కాంగ్రెస్ ఇన్‌ఛార్జిక్రాంతినాయుడు రోడ్డుపై బైఠాయించారు. మిగిలిన సరుకుకు శుక్రవారం కొనుగోలు చేస్తామని వ్యాపారులు అంగీకరించడంతో రైతులు ఆందోళన విరమించారు.

*చిత్రం...పత్తికొండలో రోడ్డుపై టమోటాలు పారబోసి ఆందోళన చేస్తున్న రైతులు