త్రివిక్రమ్‌తో కొత్త చిత్రం

టాలెంటెడ్ దర్శకుడుగా గుర్తింపు తెచ్చుకున్న త్రివిక్రమ్ ఇటీవలే రూపొందించిన ‘అ ఆ’ సినిమా మంచి హిట్ టాక్‌తో రన్ అవుతోంది. చక్కటి కుటుంబ కథలను తెరకెక్కించడంలో ఆయనకు ఆయనే సాటి. ‘అ ఆ’ సినిమా తర్వాత త్రివిక్రమ్‌తో ఓ భారీ చిత్రాన్ని నిర్మించేందుకు సన్నాహాలు చేస్తున్నారు ప్రముఖ నిర్మాత దిల్‌రాజు. మంగళవారం ఆయన కార్యాలయంలో ఏర్పాటు చేసిన సమావేశంలో దిల్‌రాజు మాట్లాడుతూ.. ‘త్రివిక్రమ్ రూపొందించిన అ ఆ చిత్రం మంచి విజయాన్ని సొంతం చేసుకుంది. నైజాంలో మేమే డిస్ట్రిబ్యూట్ చేశాం. విడుదల చేసిన ఐదురోజుల్లోనే 12 కోట్ల గ్రాస్ కలక్షన్స్ సాధించింది. నితిన్ కెరీర్‌కు ఇదొక టర్నింగ్ పాయింట్. అన్ని వర్గాల ప్రేక్షకులను ఆకట్టుకున్న ఈ సినిమాతో బయ్యర్లు, డిస్ట్రిబ్యూటర్లందరూ ఆనందంగా ఉన్నారు. తప్పకుండా ఈ చిత్రం 60 కోట్ల మార్కెట్‌ను క్రాస్ చేస్తుంది. త్రివిక్రమ్‌తో ఓ భారీ సినిమా ప్లాన్ చేస్తున్నాను. ‘నువ్వేకావాలి’ సినిమా అప్పటినుంచి నాకు మంచి స్నేహం ఉంది. సినిమాల గురించి ఎన్నో విషయాలు చర్చించుకుంటాం. ఇప్పుడు మా బ్యానర్‌లో ఆయనతో ఓ భారీ సినిమా ప్లాన్‌చేస్తున్నాం. త్వరలోనే దీనికి సంబంధించిన మిగతా వివరాలు తెలియజేస్తా’ అని అన్నారు.