అర్ధనారి వస్తోంది

అర్జున్ యజత్, వౌర్యాని ప్రధాన పాత్రల్లో పత్తికొండ సినిమాస్ పతాకంపై భానుశంకర్ చౌదరి దర్శకత్వంలో రవికుమార్ నిర్మిస్తున్న చిత్రం ‘అర్ధనారి’. దీని ట్రైలర్‌ను శనివారం హైద్రాబాద్‌లోని ప్రసాద్ ల్యాబ్స్‌లో సీనియర్ జర్నలిస్ట్ పసుపులేటి రామారావు విడుదల చేశారు. ఈ సందర్భంగా ఆయన మాట్లాడుతూ, ‘్భనుశంకర్ గతంలో చాలా పాత్రలు చేసినా ప్రతిభకు తగిన సినిమా పడలేదు. ఈ సినిమాతో భానుకి మంచి లైఫ్ వస్తుందని భావిస్తున్నా’అని చెప్పారు. దర్శకుడు భానుశంకర్ మాట్లాడుతూ, ‘ఇలాంటి సినిమాలు చాలా అరుదుగా వస్తుంటాయి. ఈ సినిమాను చాలామంది హీరోలతో చేయడానికి ప్రయత్నించినా, అర్ధనారి పాత్రలో నటించడానికి ఎవరు ముందుకురాలేదు. 40కోట్ల బడ్జెట్‌తో ఈ సినిమా చేయాలనుకున్నాం. కానీ నిర్మాతలకు ఉన్న పరిధిలో చక్కగా ఈ చిత్రాన్ని రూపొందించాం. సుమారు 85రోజుల పాటు నిజామాబాద్‌లో షూటింగ్ చేశాం. జూలై 1న ఈ చిత్రాన్ని విడుదల చేయడానికి సన్నాహాలు చేస్తున్నాం’ అని చెప్పారు. నిర్మాత రవికుమార్ మాట్లాడుతూ, ‘చాలామంది హీరోలతో సినిమా చేయడానికి సంప్రదించినా కుదరలేదు. ఓ మంచి సినిమా చేశామని తృప్తి ఉంది. ప్రేక్షకులను ఆదరిస్తారనే నమ్మకముంది’అని చెప్పారు. ఇంకా ఈ కార్యక్రమంలో కర్లపూడి కృష్ణ, వౌర్యాని పాల్గొన్నారు. ఈ చిత్రానికి ఫొటోగ్రఫీ: సాయిశ్రీనివాస్ గాదిరాజు, ఎడిటర్: కోటగిరి వెంకటేశ్వరరావు, సంగీతం: రవివర్మ, ఆర్ట్: డి.వై.సత్యనారాయణ; మాటలు: నివాస్, నిర్వహణ నిర్మాత: కర్లపూడి కృష్ణ, సమర్పణ : భరత్‌రాజ్, నిర్మాత: రవికుమార్, కథ, స్క్రీన్‌ప్లే, దర్శకత్వం: భాను శంకర్‌చౌదరి.