నాని లోకల్

నాని, కీర్తి సురేష్ జంటగా త్రినాథరావు నక్కిన దర్శకత్వంలో రాజు రూపొందిస్తున్న చిత్రం ‘నేను లోకల్’ (ఆటిట్యూడ్ ఐస్ ఎవిరీథింగ్). శ్రీ వెంకటేశ్వరా క్రియేషన్స్ పతాకంపై రూపొందిస్తున్న చిత్రానికి సంబంధించిన ప్రారంభోత్సవ కార్యక్రమం హైదరాబాద్‌లో జరిగింది. ఈ సందర్భంగా దర్శకుడు మాట్లాడుతూ, కేరెక్టర్ బేస్డ్ లవ్‌స్టోరీగా రూపొందించిన ఈ చిత్రం ఆర్య చిత్రాల స్థాయిలో వుంటుందని, ఈనెల 15 నుండి రెగ్యులర్ షూటింగ్ ప్రారంభిస్తామని తెలిపారు. ఈ సంవత్సరం చివరి భాగంలో విడుదల చేసే విధంగా సన్నాహాలు జరుపుతున్నామన్నారు. తాను నటించిన ఓ చిత్రం 50 రోజులు పూర్తిచేసుకుందని, ఒకటి విడుదలకు సిద్ధమవుతోందని, ఇవాళ మరో చిత్రం ప్రారంభమైందని నాని తెలిపారు. కథలు వింటూనే తాను ఎంజాయ్ చేస్తానని, దర్శకుడు ఈ సినిమాను చక్కగా తీస్తారన్న నమ్మకం ఉందని ఆయన అన్నారు. హీరో నాని పాత్ర సరికొత్తగా వుంటుందని, దేవిశ్రీ ప్రసాద్ సంగీతం ఈ సినిమాకు ప్లస్ పాయింట్ అవుతుందని, లవ్ ఎంటర్‌టైనర్‌గా రూపొందించే ఈ సినిమా అందరికీ నచ్చుతుందని నిర్మాత అన్నారు. కార్యక్రమంలో అరవింద్, శ్యాంప్రసాద్, జెమిని కిరణ్, రవికిశోర్, దానయ్య, దాము, ఠాగూర్ మధు, హరీశ్ శంకర్, వంశీ పైడిపల్లి తదితరులు హాజరయ్యారు. ఈ చిత్రానికి కెమెరా:నిజార్ షఫి, సంగీతం:దేవిశ్రీ ప్రసాద్, కథ, స్క్రీన్‌ప్లే, మాటలు:ప్రసన్నకుమార్, దర్శకత్వం:త్రినాథరావు నక్కిన.