26న గ్యారేజ్ మలయాళ పాటలు?

ఎన్టీఆర్, సమంత, నిత్యామీనన్ హీరోహీరోయిన్లుగా కొరటాల శివ దర్శకత్వంలో మైత్రి మూవీ మేకర్స్ పతాకంపై తెరకెక్కుతున్న జనతా గ్యారేజ్ చిత్రం వచ్చేనెల 2న విడుదలకు సిద్ధవౌతోంది. ఇప్పటికే తెలుగులో భారీ అంచనాలతోపాటు మంచి బిజినెస్‌ను జరుపుకుంటున్న ఈ సినిమాపై సర్వత్రా ఆసక్తి నెలకొంది. ప్రముఖ మలయాళ నటుడు మోహన్‌లాల్ ముఖ్య పాత్రలో నటిస్తున్న ఈ చిత్రాన్ని తెలుగుతోపాటు మలయాళంలో విడుదల చేయడానికి ప్లాన్ చేశారు. దేవిశ్రీప్రసాద్ సంగీతం అందించిన తెలుగు పాటలు ఇటీవలే విడుదలై మంచి విజయాన్ని నమోదుచేసుకున్నాయి. మలయాళ వెర్షన్ పాటల్ని ఈనెల 26న కొచ్చిలో విడుదల చేస్తారట. ఈ సినిమాతో ఎన్టీఆర్ మలయాళంలోకి ఎంట్రీ ఇస్తున్నాడు. అక్కడ కూడా ఈ సినిమాకు భారీ హైప్ నెలకొంది.