మార్చిలో వందో చిత్రం

సంక్రాంతికి ‘డిక్టేటర్’ చిత్రంతో ప్రేక్షకుల ముందుకు వచ్చిన బాలకృష్ణ తన తదుపరి చిత్రానికి సన్నాహాలు మొదలుపెట్టాడు. ఇప్పటికే 99 చిత్రాల్లో నటించిన ఆయన తన 100వ చిత్రాన్ని భారీ స్థాయిలో తెరకెక్కించేందుకు ప్రయత్నాలు చేస్తున్నాడు. ఇప్పటికే ఈ సినిమాపై రకరకాల వార్తలు ఊపందుకున్నాయి. మొత్తానికి బాలయ్య 100వ సినిమాపై క్లారిటీ వచ్చేసింది? సోమవారం ఆయన తెలంగాణా ముఖ్యమంత్రి కెసిఆర్‌ను కలిసినప్పుడు తన 100వ సినిమా విశేషాలను చెప్పినట్టు తెలిసింది. ఆయన 100వ చిత్రంగా ‘ఆదిత్య-999’ను తెరకెక్కిస్తారట. ప్రముఖ సీనియర్ దర్శకుడు సింగీతం శ్రీనివాసరావు దర్శకత్వంలో ఈ చిత్రం రూపొందనుందని ఇప్పటికే స్క్రిప్ట్ వర్క్ కూడా చివరి దశలో ఉందట. వీరిద్దరి కలయికలో ‘ఆదిత్య-369’ చిత్రం అప్పట్లో సంచలన విజయం సాధించింది. ప్రస్తుతం తెరకెక్కే ‘ఆదిత్య-999’ సినిమాకు సంబంధించిన అధికారిక వివరాలు త్వరలో వెల్లడికానున్నాయి.