పాటల్లో మహర్జాతకులు

అభిషేక్ మధుశ్రీ, డేవిడ్‌రాజ్, మోనా, స్మైలీ ప్రధాన పాత్రల్లో గతంలో ‘అలివేలు’, ‘నైస్‌గయ్’, ‘ఎవరినైనా.. ఎదిరిస్తా’ వంటి చిత్రాలకు దర్శకత్వం వహించిన పరకోటి బాలాజీ స్వీయ దర్శకత్వంలో రూపొందిస్తున్న చిత్రం ‘మహర్జాతకులు’. ధృవ ఆర్ట్స్ పతాకంపై తెరకెక్కిన ఈ చిత్రంలోని పాటలు హైదరాబాద్‌లో విడుదలయ్యాయి. తెలంగాణ ఫిలిం చాంబర్ అధ్యక్షుడు ప్రతాని రామకృష్ణగౌడ్ సీడీని ఆవిష్కరించారు. ఈ కార్యక్రమంలో సతీష్‌కుమార్, మోహన్‌గౌడ్ తదితరులు పాల్గొన్నారు. ఈ సందర్భంగా రామకృష్ణ గౌడ్ మాట్లాడుతూ- తెలంగాణ ప్రభుత్వం సినిమా రంగాన్ని మరింత అభివృద్ధి దిశలో పయనించేలా చేస్తుండడం ఆనందంగా వుందని, ఐదవ ఆటను చిన్న సినిమాలకు కేటాయించడంతోపాటు షూటింగ్‌ల అనుమతికి సింగిల్ విండో విధానం అమలు చేస్తూ నిర్ణయం తీసుకోవడం హర్షదాయకమని, ఈ చిత్రంలోని పాటలు బాగున్నాయని, సినిమా విడుదల సమయంలో తమ వంతు సహకారం అందిస్తామని పేర్కొన్నారు. శ్రీరంగం సతీష్‌కుమార్ మాట్లాడుతూ- చిన్న సినిమాను బతికించుకోవడం కోసం గతంలో ఎన్నో ఉద్యమాలు, నిరాహారదీక్షలు చేశామని, ఆ ఆకాంక్షలు నేడు నెరవేరడం చాలా హ్యాపీగా వుందని పేర్కొన్నారు. దర్శక నిర్మాత బాలాజీ మాట్లాడుతూ - క్రైమ్ కామెడీ కథాంశంతో తెరకెక్కిన ఈ చిత్రం ముగ్గురు కుర్రాళ్ల జీవితంలో జరిగిన పరిణామాలతో వుంటుందన్నారు. అక్టోబర్ నెలాఖరులో చిత్రాన్ని ప్రేక్షకుల ముందుకు తీసుకురావడానికి సన్నాహాలు చేస్తున్నామని చెప్పారు.