బేవాచ్‌లో ప్రియాంకచోప్రా

బాలీవుడ్ నటి ప్రియాంకచోప్రాకు హాలీవుడ్ సినిమాలో నటించే అవకాశం లభించింది. ఇప్పటికే అమెరికా టివి షో ‘క్వాంటికో’లో నటించి ఆదరణ పొందిన ప్రియాంక ఇప్పుడు హాలీవుడ్ సినిమాలో నటించనుంది. అయితే హీరోయిన్‌గా కాదు. ఆమె ప్రతినాయిక పాత్రలో కన్పిస్తుంది. ఈ చిత్రానికి సంబంధించిన షూటింగ్ వచ్చేవారం ప్రారంభమవుతుంది. లాస్‌ఎంజిలిస్, కాలిఫోర్నియా తీరంలో గస్తీదళ సిబ్బంది, వారి పనితీరుపై వచ్చిన టీవీ ధారావాహిక ‘బేవాచ్’ ప్రపంచంలో ఎక్కుమంది చూసిన సీరియల్‌గా రికార్డులు నమోదుచేసిన విషయం తెలిసిందే. 1980-90 దశకంలో ‘బేవాచ్’ పేరిట వచ్చిన టీవీ షోలో పమేలా అండర్సన్, డేవిడ్ హసిల్‌హాఫ్ ప్రధానపాత్రల్లో నటించారు. కాగా ఆ సీరియల్ ఆధారంగా అదే పేరుతో ఇప్పుడు సినిమా నిర్మిస్తున్నారు. ఇందులో ఆమె ప్రతికథానాయికగా నటిస్తోంది. 2017లో ఈ సినిమా విడుదల చేయాలని భావిస్తున్నారు. ఈ విషయాన్ని హాలీవుడ్ నటులు జాన్సన్, ది రాక్ ధ్రువీకరిస్తూ ఇన్‌స్టాగ్రామ్‌లో ఓ ఫొటో పోస్ట్ చేశారు. తను ఆ సినిమాలో నటిస్తున్న విషయం నిజమేనని ప్రియాంకకూడా ట్విట్టర్‌లో చేసిన ట్వీట్‌కు బాలీవుడ్ నటీనటులు సన్నీలియోన్, మధుర్‌భండార్కర్ తదితరులు హర్షం వ్యక్తం చేస్తూ రీట్వీట్ చేశారు.