చిత్రమైన ప్రపోజలేమో..

భిన్నమైన కథలతో... అంతకంటే భిన్నమైన సినిమాలతో ఆకట్టుకునే ప్రయత్నం చేస్తున్నాడు శర్వానంద్. హీరోయిజానికి దూరంగా కథలకే ప్రాధాన్యనిస్తూ అటు ఫ్యామిలీ ప్రేక్షకులకు ఇటు యూత్‌కు దగ్గరయ్యాడు. తాజాగా ‘పడి పడి లేచే మనసు’ అంటూ సాయి పల్లవితో జోడిగా వస్తున్నాడు. హను రాఘవపూడి దర్శకత్వంలో తెరకెక్కిన ఈ సినిమా ఈనెల 21న విడుదల అవుతున్న సందర్భంగా శర్వాతో ఇంటర్వ్యూ...

* సినిమా ఎలా వచ్చింది?
-బాగా వచ్చింది. కాన్ఫిడెంట్‌గా ఉన్నాం.
* ఇంతకీ కథేమిటి?
-ఇదో మంచి ప్రేమకథ. అమ్మాయి అబ్బాయి మధ్య ప్రేమ అంతే. కాకపోతే దాన్ని ఎలా భిన్నంగా చూపించామన్నదే సినిమా. కథ మొత్తం కలకత్తా నేపథ్యంలోనే. ట్రైలర్‌లో చెప్పినట్టు.. హీరో అర కిలోమీటరు దూరంనుండి అమ్మాయిని చూస్తూ ప్రేమిస్తుంటాడు..
* రియల్ లైఫ్ లవ్‌లోనూ పడి లేచినట్టున్నారు?
-ఇప్పుడు కాదు... సరైన టైంలో చెబుతా.
* టైటిల్ చెప్పినప్పుడు ఎలా అనిపించింది?
-బాగా నచ్చింది. ప్రేమలో పడటం లేవటం ఉంటాయిగా.. ఇది అందరికీ కనెక్ట్ అవుతుందని పెట్టాం.. అందరికీ బాగా నచ్చింది.
* మీ పాత్ర గురించి?
-నా పాత్ర పేరు సూర్య. యాక్టివ్ పర్సన్. సూర్యుడిలా బ్రెయిట్‌గా ఉంటాడు. సూర్యుడు ప్రపంచానికి వెలుగు పంచితే ఈ సూర్య అమ్మాయికి ప్రేమను పంచుతాడు. ఇందులో ఫుట్‌బాల్ ప్లేయర్‌గా కనిపిస్తా.
* మణిరత్నం సఖి ఛాయల్లో ఉంటాయంటున్నారు?
-ఆ సినిమాకు ఈ సినిమాకు ఎక్కడా పోలిక ఉండదు. కాని అలా ఓ గొప్ప సినిమాతో పోలిస్తే బెటరే. అలా అనిపించడానికి కారణం హీరోయిన్ ఇందులో డాక్టర్ కావడం. పైగా లవ్ సన్నివేశాలు హను అద్భుతంగా తెరకెక్కించాడు. అందుకేనేమో...
* సాయి పల్లవితో కెమిస్ట్రీ ఎలా ఉంది?
-ఆమె గొప్ప నటి. అద్భుతంగా నటించింది.. ఈ సినిమాలో మా ఇద్దరి మధ్య కెమిస్ట్రీ బాగా కుదరడానికి కారణం అదే కావొచ్చు.
* సాయి పల్లవి గొడవ చేస్తుందంటూ ప్రచారం జరుగుతుంది.. మీకు అలాంటి సందర్భం ఎదురైందా?
-నిజంగా అది ఎవరు చెప్పారో కానీ సాయి పల్లవి మంచి అమ్మాయి. నెట్‌లో చూసి, ఇలా రాసారేమిటి అని అడిగాను. తాను చాలా మంచి నటి. మంచి అమ్మాయి. మా టీమ్‌లో ఎవరిని అడిగినా చెబుతారు. కావాలని ఎవరో నిందలు వేస్తున్నారు.
* దర్శకుడు హను గురించి?
-హనుతో ఎప్పటినుండో సినిమా చేయాలని ఉంది. తాను చేసిన లై సినిమా తరువాత ఈ స్క్రిప్ట్ చెప్పాడు. కథ కొత్తగా అనిపించింది. అర కిలోమీటరు దూరం నుండి ప్రేమించడం అన్న పాయింట్ బాగా వచ్చింది. నాకు తెలిసి ఏ లవర్ అలా ప్రేమించడేమో... తాను మంచి టెక్నీషియన్. నిజంగా చెప్పాలంటే జూనియర్ మణిరత్నం.
* ప్రస్థానం లాంటి సినిమాలు చేయడం లేదు?
-అలాంటి కథలు వస్తున్నాయి.. కానీ అందులో కంటెంట్ నచ్చక చాలా వద్దనుకున్నా.. నాకు స్క్రిప్ట్ నచ్చితే తప్పకుండా చేస్తా. గిరి గీసుకోను.
* సుధీర్‌వర్మ సినిమా ఎంతవరకు వచ్చింది?
-సుధీర్‌వర్మ సినిమా దాదాపు సగం అయిపోయింది. ఇంకా టైటిల్ ఫిక్స్ చేయలేదు.
* 96 రీమేక్‌లో నటిస్తున్నారా?
-తమిళ్‌లో సూపర్ హిట్ అయిన 96 రీమేక్ గురించి త్వరలో చెబుతా. ప్రస్తుతం చర్చల్లో ఉంది. ఆ సినిమా చూసాను చాలా బాగా వచ్చింది.
* నెక్స్ట్ సినిమాలు?
-ప్రస్తుతానికి కథలు వింటున్నాను.. ఇంకా ఏవీ ఫైనల్ చేయలేదు.