ఆనంద.. అల’కనంద

అల.. వైకుంఠపురములో చిరునవ్వుల అలకనంద లుక్కిది. తెలుగు, తమిళ, హిందీ భాషల్లో కథానాయికగా ఒకప్పటి టబు క్రేజ్ ప్రత్యేకంగా చెప్పాల్సిన పని లేదు. టాప్ హీరోలతో ప్రాధాన్యత కలిగిన పాత్రలు చేసిన టబు, నాయిక ప్రాధాన్యతా చిత్రాల్లోనూ ఓ మెరుపు మెరిపించింది. హీరోయిన్‌గా అవకాశాలు తగ్గిన తరువాత -వయసుకు తగిన పాత్రలతో కెరీర్ కొనసాగిస్తోంది. కొంత గ్యాప్ తరువాత -అల.. వైకుంఠపురములో చిత్రంతో మళ్లీ ఎంట్రీ ఇస్తోన్న టబు శ్రీమంతురాలు అలకనందా దేవి పాత్ర పోషిస్తోంది. ఆమె పుట్టిన రోజు సందర్భంగా అల వైకుంఠపురంలో టీమ్ శుభాకాంక్షలు చెబుతూ -చిరునవ్వులు చిందిస్తోన్న అలకనంద లుక్ విడుదల చేసింది. త్రివిక్రమ్ దర్శకత్వంలో అల్లు అర్జున్- పూజాహెగ్డే జోడీగా తెరకెక్కుతోన్న సినిమా -అల.. వైకుంఠపురములో. సినిమాలో ఆమె పాత్ర చాలా పవర్‌ఫుల్‌గా ఉండనుందన్నది చిత్రబృందం మాట. తమన్ సంగీతం సమకూరుస్తోన్న సినిమా సంక్రాంతికి థియేటర్లకు రానుండటం తెలిసిందే.