రోడ్డుప్రమాదంలో ఆటోడ్రైవర్ మృతి

చోడవరం, డిసెంబర్ 17: గూడ్సు ఆటోను టిప్పర్ ఢీకొన్న సంఘటనలో ఆటోడ్రైవర్ అక్కడికక్కడే మృతిచెందిన ప్రమాదం మండలంలోని అడ్డూరు గ్రామం వద్ద ఆదివారం అర్ధరాత్రి చోటుచేసుకుంది. ఇందుకు సంబంధించిన వివరాలిలావున్నాయి. మాడుగుల మండలం కృష్ణాపురం గ్రామానికి చెందిన దాడి నాగ వెంకట సత్యనారాయణ కూరగాయలు తీసుకుని విశాఖకు వెళ్లి అక్కడ అన్‌లోడ్ చేసి తిరిగి ఇంటికి తిరుగుప్రయాణమై వస్తుండగా అడ్డూరు గ్రామం వద్ద ఎదురుగా వస్తున్న టిప్పర్ లారీ బలంగా ఢీకొట్టింది. ఈ ప్రమాదంలో ఆటోడ్రైవర్ అక్కడికక్కడే మృతిచెందాడు. అలాగే ఆటోలో ఉన్న కామాకుల రాజు గాయాలపాలయ్యారు. గాయపడిన అతడిని 108 అంబులెన్సులో విశాఖకు తరలించారు. ఆటోడ్రైవర్ సత్యనారాయణ భార్య మంగ ఇచ్చిన ఫిర్యాదు మేరకు ఎస్‌ఐ మునాఫ్ కేసునమోదు చేస్తున్నారు. మృతునికి భార్యతోపాటు పాప, బాబు ఉన్నారు.