వద్దంటే వద్దు..

‘‘హలో.. నేను సుబ్బారావునే మాట్లాడుతున్నా... ఏంటో తొందరగా చెప్పండి’’
‘‘మీరా సార్..! మీరింత సింపుల్‌గా ఉంటారని ఊహించలేదు. ప్రపంచానికి మార్గదర్శకత్వం వహించే మీ గొంతు వంద ఘంటసాలల గొంతులా గంభీరంగా ఉంటుందనుకున్నా. కుటుంబరావుల గొంతులా ఇంత సింపుల్‌గా ఉంటుందని అస్సలు ఊహించలేదు సార్!’’
‘‘నాకు పొగడ్తలంటే అస్సలు నచ్చవు. నువ్వేదో వాస్తవాలు చెబుతున్నావని వింటున్నా. నాకు ఫోన్‌లో మాట్లాడేంత తీరిక లేదు. విషయం చెప్పండి..’’
‘‘సార్! మిమ్మల్ని పొగిడే అవకాశం దక్కడం ఏ జన్మలోనో చేసుకున్న పుణ్యం ! మీరు వద్దన్నా మిమ్మల్ని పొగిడి తీరుతాం’’
‘‘సర్లే.. నినె్నందుకు కాదనాలి. పుండును గిచ్చుకోవడం మంచిది కాదని తెలుసు. ఐనా పుండును గోక్కుంటే వచ్చే మజానే వేరు. పొగడ్తలూ అంతే- నీ ఇష్టం వచ్చినంత సేపు పొగుడుకో.. ఫోన్ ఎందుకు చేశావో ముందు చెప్పు’’
‘‘ప్రపంచమంతా మీ పేరు మార్మోగుతోంది. జైషే మహమ్మద్ చీఫ్ మసూద్ అజార్‌ను అంతర్జాతీయ ఉగ్రవాదిగా ఐక్యరాజ్య సమితి ప్రకటించడం వెనుక మీ కృషిని ప్రపంచం ఎప్పుడూ గుర్తుంచుకుంటుంది సార్!’’
‘‘దానిదేముంది.. నా జీవితమే ప్రజలకు అంకితం. ప్రపంచ ప్రజల కోసం పని చేయడంలోనే నాకు సంతృప్తి. నేను ఈ విషయం ఎప్పుడో మరిచిపోయా. కుడి చేతితో చేసిన దానం ఎడమ చేతికి తెలియవద్దు అంటారు. మనం చేసిన సేవను మనం చెప్పుకుంటే దానికి విలువ ఉండదు. అందుకే నాకు చాతనైంది, చేయగలిగింది చేస్తా. అప్పుడే మరిచిపోతాను. నువ్వు కాల్ చేసి చెప్పేంత వరకు ఇది నాకు గుర్తుకు రాలేదు’’
‘‘మహానుభావులు సార్! ఈ రోజుల్లో ఆవగింజంత సహాయం చేసి గుమ్మడి కాయంత ప్రచారం చేసుకుంటారు. మీరు ప్రపంచాన్ని ఉగ్రవాదం నుంచి రక్షించినా నాదేముంది? అని సింపుల్‌గా మాట్లాడుతున్నారు.’’
‘‘ఈ దేహం లోక కల్యాణం కోసం ఉపయోగపడితే అంతకు మించిన సంతోషం ఏముంటుంది? జీవితానికి అంతకు మించిన సార్థకత ఏ ముంటుంది?’’
‘‘మీరు చెప్పలేదు కానీ నాకా రహస్యం తెలుసు..’’
‘‘ఏ రహస్యం?’’
‘‘హిమాలయాల్లో యతి అడుగు జాడలు కనిపించాయని వార్తలు వస్తున్నాయి. అక్కడ యతిల నివాసానికి మీరే కారణం కదూ? యతిలను అక్కడే ఉండాలని చెప్పింది మీరే, యతిల అడుగు జాడలు కనిపెట్టింది మీరే కదూ? నాకు తెలియదనుకోకండి సార్. యతి నివాసం అక్కడ ఉంటుందని ప్రపంచానికి తొలిసారి మీరే చెప్పారు.
‘‘ఇలాంటి చిన్న పనులు ఎన్నో చేస్తుంటాం. ఎన్నని గుర్తు పెట్టుకుంటాం?’’
‘‘ఎవరికీ చెప్పొద్దు. ఏదో పాత స్నేహితుడివని నీకో మాట చెబుతున్నా. ఉత్తర కొరియాను కంట్రోల్ చేసింది ఎవరనుకుంటున్నావ్?.’’
‘‘అమెరికా..’’
‘‘అది బయటి ప్రపంచానికి నేను చెప్పిన విషయం. కానీ నిజానికి అసలు రహస్యం వేరుగా ఉంది. ఉ.కొరియా వద్ద అణుబాంబులున్నాయి తెలుసు కదా? ఉ.కొరియా పాలకుడు కిమ్ అసలే తలతిక్క మనిషి. అమెరికాపై అణుబాంబులు వేసి తడాఖా చూపిస్తానన్నాడు. అమెరికా అధ్యక్షుడు ట్రంప్ మరీ అమాయకుడు. కిమ్‌తో గిల్లికజ్జాలు పెట్టుకోసాగాడు. ప్రపంచం ప్రమాదంలో పడ్డప్పుడు మనం ఇంట్లో కూర్చోలేం కదా? తొలిసారిగా నా ఇగోను పక్కన పెట్టి రంగంలోకి దిగాను. నన్ను పిలవక పోయినా కిమ్‌ను కలిసి నచ్చచెప్పాను. ట్రంప్‌ను మందలించాను, నిన్ను నువ్వు ఏమనుకుంటున్నావ్! ప్రపంచాన్ని నాశనం చేయాలనుకుంటున్నావా? అని నాలుగు చివాట్లు పెట్టి బుద్ధి చెప్పాను. నేనంటే ఉన్న అభిమానంతో దారికి వచ్చాడనుకో. ఇద్దరికీ నచ్చజెప్పి, ఇద్దరినీ సమావేశపరిచి మనస్పర్థలు దూరం చేశాను. ఇండియా, పాక్‌ల మధ్య యుద్ధానికి అంతా సిద్ధం చేసుకున్నాక రంగంలోకి దిగి ఇద్దరికీ నచ్చజెప్పా..’’
‘‘అప్పుడే అనుకున్నా.. మరేంటి సార్.. కేఏ పాల్ తానే యుద్ధం ఆపానని అంటున్నాడు..’’
‘‘పాల్ అంటే నాకు చాలా అభిమానం. తెలియని విషయం తెలియదని చెప్పుకోవాలి. బహుశా పాల్ కూడా యుద్ధం ఆపేందుకు ప్రయత్నించాడేమో, ఆ విషయం నాకు ముందే చెబితే జోక్యం చేసుకునే వాడిని కాదు. యుద్ధం ఆగింది మాత్రం నా మధ్యవర్తిత్వంతోనే.. సరే ఇంకో కాల్ వస్తోంది. ఇక ఉంటాను’’
‘‘ఓకే సార్.. ధన్యవాదాలు’’
‘‘హలో.. నేనే సుబ్బారావును మాట్లాడుతున్నా... దేని కోసం కాల్ చేశారు’’
‘‘నేను ఢిల్లీ నుంచి కాల్ చేస్తున్నా.. దేశం ఇప్పుడు క్లిష్టపరిస్థితిలో ఉంది. మీరు ఒప్పుకోవాలి తప్పదు. దేశం మిమ్మల్ని ప్రార్థిస్తోంది, దీనంగా వేడుకుంటోంది. మీరు ఒప్పుకోవాలి..’’
‘‘ఏం మాట్లాడుతున్నావ్! నన్ను ఒక దేశానికో, ఒక రాష్ట్రానికో పరిమితం చేయాలని చూస్తున్నావా? నేను విశ్వ మేధావిని, విశ్వ మానవుడిని, విశ్వ ట్రబుల్ షూటర్‌ను, ఏ దేశానికి ప్రమాదం వాటిల్లినా ఆదుకునేవాడిని, అలాంటిది నన్ను ఒక్క దేశానికే పరిమితం చేయాలనుకుంటారా? నో.. నేను ఒప్పుకోను..’’
‘‘సార్.. సార్.. మీరు ఒప్పుకోవాలి. బొబ్బిలిపులి సినిమాలో ఎన్టీఆర్ ఏమన్నారో గుర్తుందా? జననీ జన్మభూమిశ్చ స్వర్గాదపీ గరీయసీ అన్నారు ఎన్టీఆర్’’
‘‘ఓయ్.. ఆ మాట అన్నది బొబ్బిలిపులిలో ఎన్టీఆర్ కాదు- రామాయణంలో ఎన్టీఆర్’’
‘‘రామాయణంలో ఎన్టీఆర్ కాదేమో శ్రీరాముడేమో?’’
‘‘ఆ అదే.. లంకలో సంపదను చూసి లక్ష్మణుడు అక్కడే ఉండిపోదామంటే- జననీ జన్మభూమిశ్చ స్వర్గాదపీ గరీయసీ అన్నాడు శ్రీరాముడు’’
‘‘ఔను సార్.. మీరు ప్రపంచ సంస్కర్త అయినా జన్మభూమిలో ప్రధానమంత్రి పదవి స్వీకరించాల్సిందే.. తప్పదు.. తప్పదు..’’
‘‘నేను ప్రధానమంత్రి పదవి రేస్‌లో లేను. ఆ పదవి నాకు వద్దు.. వద్దు.. వద్దు.. ప్లీజ్ నన్నిలా వదిలేయండి..’’
***
ఏంటా కలవరింతలు? లేవండి తెల్లారింది. ఈ రోజు ఆదివారం ఆడవారికి సెలవు. మీరు వద్దన్నా, మీవల్ల కాదన్నా.. ఈరోజు బట్టలన్నీ మీరే ఉతకాలి. వంట వండాలి. వదిలే ప్రసక్తే లేదు’’ *