చేయి చేయి కలిపి..

అది బెంగాల్ రాష్ట్రం.. అక్కడ కొన్ని గ్రామాల మహిళలందరూ ఒకేచోట చేరారు. అందరూ ఒకేమాటపై నిలబడ్డారు. చేయి చేయి కలుపుకుని తమ గ్రామాలను అనుసంధానం చేసే రోడ్లను వాళ్లే వేసుకున్నారు. వారికి సాయం చేసేందుకు ఓ స్వచ్ఛంద సంస్థ ముందుకొచ్చింది. దాంతో పదిహేనురోజుల్లోనే రోడ్డు నిర్మాణం పూర్తయింది. అలా వేసుకున్న ఆ రోడ్డు 17 గ్రామాల ప్రజల జీవితాలను మారుస్తోంది. ఎందుకంటే అక్కడ సరైన రోడ్డు లేక గర్భస్రావాలు జరిగాయి. పిల్లల చదువులు ఆగిపోయాయి. రోగుల ప్రాణాలు గాల్లో కలిసిపోయాయి. ఏళ్లు గడుస్తున్నా అధికారులు స్పందించలేదు. ప్రభుత్వం అటువైపు తొంగి కూడా చూడలేదు. దాంతో ఆ మహిళలు తమ తలరాతను తామే మార్చుకోవాలని నిర్ణయించుకున్నారు. పట్టుదలతో కృషి చేస్తే సాధించలేనిది ఏదీ లేదని రుజువు చేసి చూపించారు. సరైన రోడ్డు వేసుకుని తమ జీవితాలను మార్చుకున్నారు.
ఒకప్పుడు.. ఆ దారంతా ఒకటే బురద.. గుంతలు.. రోడ్డు దాటాలంటే.. చాలా కష్టం. చీరపైకి పట్టుకోవాల్సిందే.. ఇక అలాంటి రోడ్లపై బండ్లు కదులుతాయా? ఇరుక్కుపోయేవి.. ఇక అలాంటి రోడ్డుపై రోగులు కానీ, గర్భిణులు కానీ నడిస్తే.. అంతే సంగతులు.. ఈ విషయం గురించి గీత అనే మహిళ కంటే మరెవ్వరికీ తెలియదేమో.. ఎందుకంటే ఈమె గర్భిణిగా ఉన్నప్పుడు ఈ రహదారిపై నడుస్తూ జారిపడింది.. ఆ సమయంలో చాలా సమస్యల్ని ఎదుర్కోవాల్సి వచ్చింది ఆమె.. రోడ్డు లేక గర్భిణులు చాలా అవస్థలు పడేవాళ్లు. ఇక ఎప్పుడైనా అత్యవసర పరిస్థితి వచ్చినప్పుడు ఓ పల్లకీ వంటి తాత్కాలిక నిర్మాణంలో మహిళను కూర్చోబెట్టి భుజాలపై మోసుకుంటూ ఆస్పత్రికి తీసుకెళ్లేవారు. ఇలా వివిధ సందర్భాల్లో మహిళలు ఎదుర్కొన్న రకరకాల సమస్యలే రోడ్డు నిర్మాణంలో వారిని ఒక్కటి చేశాయి. ఇప్పుడు ఆ రోడ్డే పిల్లల బంగారు భవిష్యత్తుకూ మార్గం చూపుతోంది.
బెంగాల్లోని త్రిడిప్ నగర్ గ్రామంలో పానీపూరీ అమ్ముకునే మీనా గయెన్ అనే మహిళ మాట్లాడుతూ.. ‘నా బండి ప్రతిసారీ గుంతల్లో ఇరుక్కుపోయేది. కొన్నిసార్లు నేను రోడ్డుకి దూరంగా బండిని నిలిపినప్పుడు జనాలు దొంగతనంగా పానీపూరీలను తీసుకెళ్లిపోయేవారు. ఒక్కోసారి జారిపడేదాన్ని. చివరికి మేమంతా కలిసి సొంతంగా ఇక్కడ రోడ్డును నిర్మించుకున్నాం.. చాలా ఆనందంగా ఉంది. రేపటి నుంచి మాకు ఎలాంటి సమస్యలూ ఉండవు..’ అని చెబుతోంది సంతోషంగా.. అలాగే పిల్లలకు కూడా ఈ రోడ్డు ఎంతో ఆనందాన్ని ఇచ్చింది. ఎందుకంటే గతుకుల రోడ్డుపై స్కూలుకు వెళ్లడానికి నానాయాతన పడేవారు. నేడు ఆ బాధ తీరింది. మట్టిలో గాజుపెంకులు గుచ్చుకోవడం, రోడ్డుపై జారిపడినప్పుడు దుస్తులు శుభ్రం చేసుకుని స్కూలుకు వెళ్లేసరికి ఆలస్యమయిపోయేది. పరీక్షలప్పుడైతే మరీ ఇబ్బందులు పడేవారు విద్యార్థులు.. ఇప్పడు వారి సమస్య తీరిపోయింది. మహిళలందరూ కలిసి నిర్మించిన చిన్న ఇటుకల రోడ్డు ఇప్పుడు విద్యార్థుల జీవితాల్లో కొత్త వెలుగులు నింపుతోంది. ప్రభుత్వమో, అధికారులో తీసుకొచ్చిన వెలుగు కాదిది. మహిళలందరూ చేయి చేయి కలుపుకుని తమకు తాముగా సాధించుకున్నది.