మీ వ్యూస్

అదే తరహా చిత్రీకరణ!

S ,7 à 8 RSCA (si SASPAS) et 6 cialis pharmacie cialis rapports de stage.

మాఫియా చిత్రాలు తీయడంలో సిద్ధహస్తుడు- ఆర్జీవీ. ‘శివ’ తర్వాత నాగార్జున, ఆర్జీవీ కలయికలో వచ్చిన ‘ఆఫీసర్’లో సవాలక్షసార్లు చూసేసిన అదే తరహా చిత్రీకరణ, అవే మాఫియాలు, అదే సౌండ్ ఎఫెక్ట్ అవే కెమేరా యాంగిల్స్. అస్సలు కొత్తదనం లేదు. కథ లైన్ కాస్త కొత్తగా అనిపించినా కథాకథనాల్లో పెప్ లేదు. దాంతో ఆఫీసర్ చతికిలపడ్డాడు. సినిమా తీసేముందే ‘చెప్పింది చెయ్యకపోతే నన్ను తన్నవచ్చు’అని ఆర్జీవీ తనకు లేఖ రాశాడని నాగార్జున చెప్పాడు. అయితే లైన్ చెప్పినంత కొత్తగా సినిమా తీయలేకపోయిన ఆర్జీవీని ఎన్ని తన్నులు తన్నినా ఫర్వాలేదన్నమాట! అయితే ఎన్నిసార్లు తన్నినా వర్మ మారడు అనేది నిజం!
- ధర్మతేజ, గొడారిగుంట
ఆదర్శప్రాయుడు
‘సమ్మోహనం’ చిత్ర దర్శకుడు ఇంద్రగంటి మోహన్‌కృష్ణ ప్రఖ్యాత రచయితలైన తన తల్లిదండ్రుల సంస్కారాన్ని పుణికి పుచ్చుకున్నాడు. ఒక ఇంటర్వ్యూలో అతని అభిప్రాయాలు- ఒక చిన్న డిజిటల్ కెమేరాతో ఆరున్నర లక్షల ఖర్చుతో 19రోజుల్లో ఆయన తీసిన తొలి చిత్రం ‘గ్రహణం’ 12 అవార్డులు సాధించింది. తన చిత్రాలకు కథ, స్క్రీన్‌ప్లే, సంభాషణలు, దర్శకత్వం తనవే. రెండు తప్ప అన్ని చిత్రాల్లో తెలుగు నటీనటుల్నే తీసుకున్నాడు. సినిమాలు ఆరోగ్యవంతంగా, అర్థవంతంగా ఉండాలంటాడు. ఐటెం సాంగ్స్, సెక్స్, హింసల్ని ప్రేక్షకులు అడగకపోయినా నిర్మాతలే అలవాటు చేశారు. నా చిత్రంలో అలాంటివి ఉండవు. స్టార్లకు భజన చేసే చిత్రాలు తియ్యను అన్నాడు. నిజంగా ఆయన ఆదర్శప్రాయుడు.
- శాంతి సమీర, వాకలపూడి
బయోపిక్‌లు..
హీరోవర్షిప్ అనే కళ్లద్దాలు ధరిస్తే చాలు నిజజీవితంలో హీరో ఎంత నికృష్టుడైనా, ఎన్ని అరాచకాలుచేసినా అవన్నీ తెరమరుగు అయిపోయి, మంచితనం చిగురంత ఉంటే కొండంత కనిపిస్తుంది. ఈ సూత్రాన్ని బాగా అర్ధంచేసుకొని బయోపిక్‌లు నిర్మిస్తున్నారు. గతంలో అజరుద్దీన్ చిత్రం అయినా ఇప్పుడు సంజు చిత్రం అయినా ఇదే సూత్రం. ఈ సూత్రానికి మినహాయింపుగా మహానటి లాంటి ఒకటిరెండు బయోపిక్‌లు కనిపిస్తాయి. సంజయ్‌దత్‌లోని వికృత మనస్తత్వానికి మసిపూసి కనిపించకుండా చేసి ప్రేక్షక హృదయ రంజిక అంశాలకు నగిషీలు చెక్కిన ఫలితంగా సంజు చిత్రం ఇప్పటికే 200 కోట్లు దాటేసింది.
- పవన్‌పుత్ర, రామారావుపేట
చాలా బాగుంది..
‘క్లైమాక్సా? మజాకా?’ వ్యాసం చాలా బాగుంది. నేటి ప్రేక్షకుడికి విషాదాంతాలు నచ్చవు గాని దశాబ్దల క్రితం దేవదాసు పార్వతి, లైలామజ్ను, అనార్కలి సలీం ప్రేమకథలన్నీ విషాదాంతాలే. హిందీ అనార్కలికి రీమేక్ తెలుగు అనార్కలి రెండింటిలోనూ అనార్కలిని సజీవంగా గోరి కడితే సలీం ఆ గోరీకి తలబాదుకొని పడిపోతాడు. కాని భారీ బడ్జెట్ భారీ హిట్ మొఘల్-ఎ-అజాం కూడా అనార్కలి కథే. అయితే ఆమెను సజీవంగా గోరీ కడితే రహస్యమార్గం గుండా బయటకుపోతుంది. ఇదంతా అక్బర్ పన్నాగం అని చెప్పి అక్బర్‌కి గొప్పదనం ఆపాదించాడు దర్శకుడు ఆసిఫ్. అయితే చరిత్ర చూస్తే అనార్కలి అనే అమ్మాయి లేనే లేదు. కల్పిత పాత్ర అది.
- సుభాష్, శ్రీనగర్
సంచలనం కోసం..
సంచలనం కోసం ఔచిత్యాన్ని బలిచేస్తున్నా యి కొన్ని ఛానల్స్. కపిల్‌దేవ్ కొంపముంచిన ఎన్టీఆర్, వచ్చే ఏడు సమంత రిటైర్ అంటూ సంచలన శీర్షికలు ఫ్లాష్ చేసింది ఒక చానల్. అసలు విషయం ఏమంటే ఎన్టీఆర్ నటించిన టెంపర్ చిత్రం హిందీ రీమేక్‌లో రణ్‌వీర్ నటిస్తున్నాడు. అతడే కపిల్‌దేవ్ బయోపిక్‌లోనూ హీరో. టెంపర్ హిందీ ముందుగా ప్రారంభం అవడంతో కపిల్ చిత్రాన్ని ఒక సంవత్సరం వెనక్కి నెట్టేశాడు నిర్మాత. దీనిలో ఎన్టీఆర్ ప్రమేయం ఏముం ది? అలాగే సమంత రిటైర్ కానుందా అంటూ కాస్సే పు సొల్లుకొట్టి అలాంటిదేమీలేదని అక్కినేని కాం పౌండ్ చెప్పిందంటూ తుస్సుమనిపించిందా చానలే!
- సౌందర్య, కాకినాడ
చిరస్మరణీయం
అక్కినేని దేవదాసు ఆంధ్రులకు చిరస్మరణీయం. అయితే ఆ చిత్రాన్ని ఈతరం ప్రేక్షకులు ఇప్పుడు చూస్తే కొన్ని సన్నివేశాలు హృదయాల్ని కదిలించినా మొత్తంగా చూస్తే బోర్‌కొడుతుంది. దేవదాసు ప్రేరణతో ఎన్నో తాగుబోతు సినిమాలొచ్చినా అవేవీ పెద్దగా హిట్ కాలేదు. అంతెందుకు? సాక్షాత్తు అక్కినేనితోనే దాసరి నారాయణరావు ‘దేవదాసు మళ్లీ పుట్టాడు’ అంటే ఎవరూ చూడలేదు. కృష్ణ దేవదాసుగా ఎంత శ్రమించినా ప్రేక్షకులు కరుణించలేదు. దేవదాసు పేరుని సొమ్ముచేసుకోడానికి చేసిన ప్రయత్నాలు హిట్‌కాకపోయినా ఇప్పుడు నాగార్జున, నానిలతో దేవదాసు పేరుతో మరో చిత్రం నిర్మాణంలో ఉంది. ఇది దేవ, దాసు అనే ఇద్దరి కథ అట! చెట్టుపేరుచెప్పి కాయలు అమ్ముకోవడం అంటే ఇదే.
- ధర్మతేజ, గొడారిగుంట
మంచి చర్చ
ఈమధ్య వెనె్నలలో మాటల అర్ధాల గురించి మంచి చర్చ జరిగింది. ఇప్పుడు నీలం అనే పదం గురించి నా అభిప్రాయం చెప్తాను. రాముడు, కృష్ణుడు పాత్రలకు నీలం రంగు పూసెయ్యడం సరికాదు. దేవతలు మనుషులకు నీలం సహజ వర్ణంకాదు. నిఘంటువు ప్రకారం నీలం అనే పదానికి నలుపు అనే అర్ధంకూడా ఉంది. కృష్ణుని నల్లనయ్య అంటాం. అందువల్ల రాముడు, కృష్ణుడు పాత్రలకు మరీ బొగ్గులాగ కాకుండా తేలికపాటి నల్లరంగు వేయడం సహజం అవుతుంది. నీలం రంగు చూడ్డానికి అలవాటుపడ్డ ప్రేక్షకులు నలుపురంగుని ఆమోదించకపోవచ్చు కాని కొన్ని హిందీ చిత్రాల్లో, టీవి సీరియల్స్‌లో నీలంకాక సహజ వర్ణంలో కృష్ణుని చూపితే ప్రేక్షకులు ఆమోదించారు మరి!
- సాహిత్యదీప్తి,
రమణయ్యపేట