శాంతి బీజం

ప్రకృతి రమణీయ
ప్రశాంత నిలయాన్ని
అతివాద జాత్యహంకారం
స్మశానవాటికగా మార్చింది

పవిత్ర ప్రార్థనా మందిరాలపై
మత విద్వేషం విషం చిమ్మి
మారణకాండను సృష్టించింది
కాల్పులతో నరమేధం సాగించింది

మసీదిప్పుడు మసీదులా లేదు
కుప్పలు తెప్పలుగా
పడివున్నా మృతదేహాలు
రక్తసిక్తమైన క్షతగాత్రుల
ఆర్తనాదాలే తప్ప

ఇప్పుడిక్కడ
ప్రార్థనల్లేవు.. ప్రవచనాల్లేవు...

జాతి వైరం జడలు విప్పిన చోట
మానవత్వం పరిమళించదు

మత విద్వేషం విరజిమ్మినచోట
విశ్వశాంతి విరాజిల్లదు

తరతరాలుగా
విశృంఖలమై విస్తరిస్తున్న
ఈ ఉన్మాద భావజాలానికి
చరమగీతం పాడకుంటే
మానవాళి మనుగడ ప్రశ్నార్థకం

వౌనం వహిస్తూ కూర్చుంటే
ప్రపంచమే అంధకారం

అందుకే
యావత్ పౌర సమాజం
మేల్కొనాల్సిన సమయమిది

మానవ జాతి ఏకమై
శాంతి బీజాలను
నాటాల్సిన తరుణమిది