వీక్షింపుమా సూర్య దేవా !

తే.గీ. చిన్న దానిని పెద్దగఁ జేయనేల
పెద్దదానిని చిన్నగ విడువనేల?
కాస్త యోచింపరేమి లోకాన జనులు?
చూడుమో కర్మసాక్షి యో సూర్యదేవ!

భావం: చిన్న విషయాన్ని పెద్దగా చేయడం దేనికి? పెద్ద విషయాన్ని తృణప్రాయంగాభావించి విడిచిపెట్టడం దేనికి? ఇలోకంలో జనులు కాస్త ఆలోచించరెందుకు? కర్మసాక్షివైన ఓ సూర్యదేవా! చూడవయ్య!

తే.గీ. అగ్నికార్జ్యంబు ఁబోయంగ నార్పు వార
లేరి? మండింపఁ జూచెడి వారుగాక;
శాంతి కాముకులేరి? రుూ జగతి యందు
చూడుమో కర్మసాక్షి యో సూర్యదేవ!

భావం; అగ్నికి ఆజ్యం పోసేవారేకాని ఆర్పేవారు ఎవరు లేరు. శాంతికాముకులు ఈలోకంలో ఎక్కడా కనబడడం లేదు. కర్మసాక్షివైన ఓ సూర్యదేవా! చూడవయ్యా!
తే.గీ. ఆత్మనుతి తోడఁ బరనింద కనవరతముఁ
బూనుకునుడది పాపాల పుట్ట గాద
తెలుసుకొనరేల? భూజనుల్ దెలివి దప్పి
చూడుమో కర్మసాక్షి యో సూర్యదేవ!

భావం: ఎల్లపుడూ ఆత్మనింద, పరస్తుతులకే అంతా పూనుకుంటున్నారు. అది పాపాల పుట్టయని జనులు తెలుసుకోలేకపోతున్నారు.కర్మసాక్షివైన ఓ సూర్యదేవ ! చూడవయ్య!

తే.గీ. ఏ యహంకార మాత్మలోనే కొలదియు
లేనివారిని భువి ఁ గాంచలేము గనగ;
యేలకో యహంకారంబు మేలుకొనరె
చూడుమో కర్మసాక్షి యో సూర్య దేవ!

భావం: ఈ భూమిమీద అహంకారం లేనివారిని చూద్దామంటే కబడడం లేదు.అ హంకారం దేనికి? ఇకనైనా మేలుకొనవలసిన అవసరం ఎంతైనా ఉంది. కర్మసాక్షివైన ఓ సూర్యదేవ! చూడవయ్య!

తే.గీ. నీతి నియమాలు గోతిలో ఁఋ౎ బాతినారు
సత్యపుంబల్కులం ద్రొక్కి చంపినారు
ధర్మదీపంబులార్పేసి తరలినారు
చూడుమో కర్మసాక్షి యో సూర్యదేవ!

భావం: నీతి నియమాలు గోతిలో పాతిపెట్టేసారు. సత్యవాక్కులను నిలువునా తొక్కి హత్య చేసేశారు. ధర్మ దీపాలు ఆర్పేసి పోతున్నారెందరో కర్మసాక్షివైన ఓ సూర్యదేవా చూడవయ్య.

తే.గీ. ఓర్వలేకుంటి రితరుల యున్కిగాంచి
స్వార్థమునకు విద్రోహాలు సల్పుచుంటి
రిదియుఁ దగదనిఁ దలుపఁ బోరేల జనులు?
చూడుమో కర్మసాక్షి యో సూర్యదేవ!

భావం: ఇతరుల యొక్క ఔన్నత్యాన్ని చూసి ఓర్వలేక పోతున్నారు. తమస్వార్థానికి గాను విద్రోహ చర్యలకు పాల్పడుతున్నారు. ఇది సరికాదని ఈజనులు భావించడం లేదెందుకనో కదా. కర్మసాక్షివైన ఓ సూర్య దేవా! చూడవయ్యా!