సూర్య శతకం

తే.గీ. పవిత్ర మూర్తులు స్ర్తిలన భారతాన
వారి నవమాన పరుచుచునేరికోరి
వెండితెరపైనఁ జూపింప దండితనమ?
చూడుమో కర్మసాక్షి! యో సూర్యదేవ!

భావం: స్ర్తిలంటే ఈ భూమీద నడిచే దేవతా మూర్తులు. అట్టి పవిత్ర స్థానాలకు నెలవులైన స్ర్తిలను కించపరిచే విధంగా వెండితెరకెక్కించడం అదేమంత గౌరవ ప్రదమైన సంగతా?సంస్కార హీనతకు పెద్దపీట వేసే బడాబాబులున్నంతకాలం పరిస్థితి ఇలాగే కొనసాగుతుంటుందే! కర్మసాక్షివైన ఓ సూర్యదేవా నీవైనా చూడవయ్య నేటి దుస్థితి.

తే.గీ. స్ర్తిలు వేల్పులు మరచితిరేని రౌర
వాది నరకాల పడుదురే! బాధలరయఁ
దీయకూడని సినిమాలు దీయుటేల?
చూడుమో కర్మసాక్షి! యో సూర్యదేవ!

భావం: ఇలపై సంచరించే దేవతామూర్తులు స్ర్తిలన్న స్ఫురణకు తిలోదకాలు వదిలేసారో ఏమో? తీయకూడని సభ్యసమాజం మెచ్చని సినిమాలు తీయడం దేనికో కదా? ఇట్టి పాపపు కృత్యాన్నికి పాల్పడిన పాపానికి రౌరవాది నరకాలలో పడిపోతారు. అక్కడ గురయ్యే వ్యధలకు అంతంలేకుండా పోతుంది. దీనిని మరిచి చేయకూడని పనులు చేస్తున్న వీరిని ఓ కర్మసాక్షి నీవైనా చూడవయ్య సూర్యదేవా!