బాగుండును

ఆకలి లేని కాలాలు
అబలలు లేని దేశాలు
మాయలేని మనుషులు
మాసిపోని మమతలు
ఉంటే బాగుండును

రైతుకి కష్టాలు
నేతకి నష్టాలు
బాల్యానికి బరువులు
బరువైన బ్రతుకులు
పోతే బాగుండును

స్వార్థానికి సంకెళ్ళు
అవినీతికి ఉరిత్రాళ్ళు
పడితే బాగుండును

న్యాయానికి కళ్ళు
ధర్మానికి పాదాలు
పుడితే బాగుండును

ఆడదంటే బొమ్మ కాదు అమ్మని
ఆ అమ్మ లేనిదే ఈ జన్మ లేదని

దేశమన్నది ఒకరి సొత్తే కాదని
శాంతి భద్రత ప్రతి పౌరుని హక్కని
మానవత్వ మొక్కటే మనిషికి చిహ్నమని
మనుషులంతా ఒక్కటైతే ప్రగతి సాధ్యమని

గగనమెత్తు గొంతుతో
సంద్రమంత శోకంతో
విన్నవించుకుంటోంది భారతావని
వింటే ఎంత బాగుండును.