శాకాహారమే భుజించుదున్..

తిండిగల వాడేను కండగల వాడోయ్.. అన్నాడే గాని కవి- బీఫ్, పోర్కు, చికెను మరిగిన వాడే క్రికేటరోయ్ అనలేదుగా. అరివీర భయంకర విరాట్ పరుగుల యంత్రం ఖోహ్లీ భాయ్ ఇంకో రకంగా వార్తలకు ఎక్కాడు ! విరాట్ మొన్న వెస్ట్ ఇండీస్ మీద వడి వడిగా తన ఇరవై నాలుగో టెస్టు సెంచరీ బాదేసి -ఆహా..! ఏమి ఫిట్నెస్ బాసు నీది..? అని సహచరులు కోరస్‌గా మెచ్చగా -‘నో చికెన్.. ఫ్రెండ్స్-’ అన్నాడు వాళ్ళ ఆఫర్ని తిరస్కరిస్తూ. నిజమే.. హైదరాబాడు వచ్చినప్పుడు మొఘల్ బిర్యానికి ఫిదా అయిపోయిన పరుగుల వీరుడు- ఈ మధ్య నాలుగు మాసాలుగా ఆకులలములు -కాయ ధాన్యములు, పప్పుదినుసులు మాత్రమే- వ్రతం చెడకుండా ఆరగిస్తూ ఉన్నాడు- ఫిట్నెస్‌కై వ్యాయామం చేయుచునే ఉన్నాడట. మొన్న ఆడకపోయినా తాజా వన్ డే ర్యాంకుల్లో ఇండియన్ రెగ్యులర్ కెప్టెన్ విరాట్ నెంబర్ వన్‌గానే ఉన్నాడు. వరసగా టెస్టు సీరీస్‌లో వెయ్యేసి పరుగులు ముమ్మారు చేసిన - మన వాడు అనుష్కా శర్మని పెళ్లి చేసుకున్నాక ఈ శాకాహార వ్యామోహంలో పడ్డాడా?అనుకోకండి.. అనుష్కా కూడా శాకాహారి అవడానికి కారణం - విరాట్‌తో సహచర్యం కాదుట! ఆమె కూడా శాకాహరియే కానీ- దానికి కార ణం ఆవిడగారి ముద్దుల శునకరాజానికి మాంసం వాసన కిట్టదు! ఔరా? అందుకని పూర్తిగా వెజ్ బిర్యానీలోకి మారిపోయందట!
విరాట్ ఇంకొక్క టెస్టు శతకం చేస్తే బ్రాడ్‌మన్ రికార్డు పటాపంచల్. ప్రస్తుతానికి ఆస్ట్రేలియన్ స్మిత్ రికార్డు ముక్కచెక్కలైంది. అందుకే మనవాడు శాకాహారం మీద ఇంత నమ్మకం పెట్టుకున్నాడు. వీగన్ ఐపోయాడు- వీగన్ అని ఉచ్చరించి ‘వేగాన్’ అని రాసే ఈ మాటకి అర్థం- ‘యమా’ లేదా ‘పరమ’ శాకాహారి అని. బహుశా -ఇందిరమ్మ చిన్న కోడలు, మోదీ క్యాబినెట్‌లో చిన్న మంత్రిగా సర్దుకుపోతున్న మేనకాగాంధీ -ప్రభావం వున్నదేమో? ఆమె కుక్కలకి కూడా పాలు పొయ్యదుట. పప్పు, అన్నం పెడుతుందిట. వేగాన్ లేదా వీగన్‌లు జంతువులను హింసించినట్లు భావించి -పాలు, పాలకోవాలు, నెరుూ్య గిరుూ్య వగరాలను ముట్టరు. కొలెస్టరాల్ , బరువు పెరుగుట వగైరాలు లేని, శాకాహారం ఆరగిస్తున్న విరాట్ బహుశా.. సెరెనా విల్లియమ్స్, ఆమె సోదరి వీనస్‌లు ఆడుతూండగా చూసే ఉంటాడు. అసలు, సెరెనా విల్లియమస్ టెన్నిస్ కోర్టులో చెలరేగి ఆడుతూంటే- రోజుకో మేకని లాగించేస్తుందేమోరా? అంటారు ఫ్యాన్స్ కొందరు. వెనుకటి మార్టినా నవ్రతిలోవా ఎడమచేతితో బాల్‌ని స్మాష్ చేస్తున్నప్పుడు ఆమె సౌష్టవం - మరుపు రానిది. కానీ ఈ ఇద్దరూ శాకాహారులు అని కొద్ది మందికే తెలుసు. ఏనుగు శాకాహారి కాగా -మందగమన సింహం మాంసాహారి కావున స్పీడుగా పరిగెడుతుంది అనుకుంటే అది మాంసాహార ప్రభావమనుకుంటే పొరపాటే. విశ్వ వఖ్యాత పరుగుల వీరుడు- కార్ల్ లూరుూస్ స్ట్రిక్టు వెజిటేరియనే.
మాంసాహార జంతువులన్నీ చిన్న సైజులో ఉన్నాయ కనుక భూమీద నరమానవులు బ్రతికి బట్ట కడుతున్నారు. ఏనుగు, ఖడ్గ మృగం వంటివి కూడా బీఫ్, పోర్క్‌తోపాటు నరమాంసం ఆరగిస్తే- అవి మాంసాహార జంతువులైతే- చెవికోసిన మేకలు చేసినట్లు మనుషులు కూడా ఆర్తనాదాలు చేసి ఉండే వారన్నాడు ఒక ఆధునిక మేధావి. సరే.. ఇవాళ కూడా తలచుకుంటేనే వొళళు ఝల్లు మనిపించే నియంత పేరు అడాల్ఫ్ హిట్లర్. ఆయన నిజానికి సలాడ్లు ,దుంపలు తినే శాకాహారి . మహాత్మా గాంధీ , అబ్దుల్ కలాం ఫక్తు శాకాహరులని మేనకా గాంధీ గారు చెప్పనక్కర లేదు. సర్ సివి రామన్,మోక్షగుండం విశే్వస్వరయ్య వెజిటేరియన్లు అంటే ఆశ్చర్యం లేదు. ఆల్డస్ హక్స్లీ , జార్జ్ బెర్నాడ్‌షా కూడా శాకాహారులు , మాంసకృత్తుల కోసం పప్పుదినుసులు మాత్రమే తినేడిరంటే నేటి యువలోకం నమ్మదు. అందుకని మనిషి రుచికే కాక ఆరోగ్యానికి, బలానికి శాకాహారం అలవాటు చేసుకోవాలి .. క్రికెట్ కోచ్‌గా వస్తూనే మ్యాచ్‌లు గెలిపించిన అనిల్ కుంబ్లే ద జంబో - పక్కా శాకాహారి. డ్రిల్లు మాష్టారుగా వాసికెక్కి- విరాట్‌కి ఐసోర్ అయి పోయాడు. ఈ గురుశిష్యులిద్దరూ ఎడమొహం పెడ మొహం అయిపోయారు . శాస్ర్తి, ధావన్ ,శర్మ, మిశ్రా, తివారీ , వాజపేయి , త్రివేది, ద్వివేది, బెనర్జీ లాంటి ఇంటి పేర్లు ఉన్న బ్రాహ్మలంతా ఇంటిపేరున్నంత మాత్రాన శాకాహారులు కారు. వీ రు నాన్ వెజ్ వరుసలో ముందుగా వచ్చి కూర్చుంటున్నారుట. ఫాస్ట్ బౌలర్ జవగళ్ శ్రీనాథ్ , వెంకటేష్ ప్రసాద్ , ఆస్ట్రేలియన్ పేసర్ పీటర్ సిడ్డుల్ మొదలయిన వారు - శాకాహారం తెమ్మని విదేశ పర్యటనలలో నిర్వాహకులకు బాధ తెప్పిస్తారు. ఇశాంత్ శర్మ తాను శాకాహారినంటూ చెపుతాడు.. కాని ఇంగ్లండులో మాంసం వడ్డించే వరసలో కూర్చుంటాడని వెంకటేశ్వర ప్రసాద్ చెప్పాడు. కృష్ణమాచారి శ్రీకాంత్ మాత్రం కేవలం ఇడ్లీ సాంబార్ వాడు. విదేశాల్లో స్థానికంగా ఉన్న తమిళియన్స్ అతనికి ఫుడ్ తెచ్చేవారుట. ఇప్పుడు తాజాగా విరాట్ రంగప్రవేశంతో -సినిమా తారలు కూడా - మేం కూడా పప్పు పచ్చడి -ఆకుకూరలు ఫ్రూట్ సలాడ్లు మాత్రమే లాగిస్తాము, మద్యం, మాంసం మాత్రం ముట్టడం మానేశాం అంటున్నారు. శరీరం నాజుకుగా ఉండాలంటే - ఓన్లీ వెజ్ అంటున్నారు అందాల వెండి తెర భామలు అనుష్కా, కరీనా కపూర్. జంతువులపై ప్రేమతో నేను శాకాహారినయ్యా న ని అంటున్నది అమీర్ ఖాన్ భార్య కిరణ్ రావ్. అందుకే అమీర్ చికిన్ తిననని అంటున్నాడు.
అరవ అయ్యంగారి పొన్ను హేమామాలిని సరే.. అయ్యర్ గారి పొన్ను విద్యాబాలన్ కూడా - పాలుం ఫలమున్ అనగా పాలు ఫలములు మాత్రమే ‘తిం దురు. కంగనా రానౌతమ్మ భారతీయ జీవనశైలికి శాకాహారం బెస్టు అన్నది . రేఖాజీ తాను మొదటినుంచి శాకాహారినే అంటుంది. దాని వల్ల మంచి ఆలోచనలు వస్తాయిట. అమితాబ్ బచ్చన్ మాత్రం శాకాహారి అవడానికి, మంచి ఆలోచనలకు సంబంధం లేదంటాడు. రజనీకాంత్ అల్లుడు ధనుష్ మాంసం తినడుట. మరిచిపోకుండా చెప్పాలి మరో భామ పేరు ఆలియా భట్ - కేవలం శాకాహారమే భుజించునట. ఎండకి తట్టుకోలేక వేడి చేసేస్తోందని వెజిటేరియన్ అయిపోయానంటోంది ఈ అందాలబొమ్మ. ఇలా అందరూ గ్రీన్ గ్రీన్ దినుసులు తింటూంటే -నాన్ వెజ్ ఫైవ్ స్టార్ చెఫ్‌లు- కోర్టుకు ఎక్కాల్సిందే. చైనా రెస్టారెంట్లకి మాత్రం ఇది మరీ దెబ్బ. కొంతమంది- ఇంట్లో రామయ్య.. వీధిలో కృష్ణయ్య అన్నట్లు ఇంట్లో వెజ్ బయట నాన్ వెజ్. ఉల్ఫా గా దొరికితే నాన్ వెజ్ - సొంత పైకం అయితే సాంబార్ రసం. ఇప్పుడు ఉప రాషప్రతి అయినాకా చెప్పలేదు కానీ- మన వెంకయ్య నాయుడు లోగడ గట్టిగా చెప్పారు- ఆయనగారు -స్ట్రిక్ట్ నాన్-వెజిటేరియన్ అని. సో.. అట్లాగా ఎంత వేగాన్ ఉద్యమాలు వచ్చినా జంట నగరాలలో తొంభై తొమ్మిది శాతం -చెప్పి తినే మంసాహారులేనని ఇలాంటి సర్వేలు ప్రకటించే ఒక- నాన్ తెలుగు పత్రిక -ఒక ప్రత్యేక కథనం ఆ మధ్య వచ్చింది. అంచేత-
మొఘల్ బిర్యానీ విల్ బీ ఆన్ డిమాండ్ ఆల్వేజ్..!