‘కునుకు’పాట్లు తెచ్చిన ‘ఉలుకు’పాట్లు!

మరో పాట, యిలా, రా.గా.- అనగా రాహుల్‌గాంధీ కునుకుపాటు మీద- లోకమంతా ఉలికిపాటు పడ్డది! వానాకాలం లోక్‌సభ చినుకుతో గాక, రా.గా. కునుకుతో మొదలైంది- అంటున్నారెవరో!
ఇంతకీ పోయిన బుధవారం నిండు లోక్‌సభలో గుజరాత్‌లో జరిగిన దళిత అత్యాచారకాండ మీద గంభీరంగా చర్చ ‘సాగు’తూండగా- అఖిల భారత కాంగ్రెస్ పార్టీ- అఖండ ఉపాధ్యక్షుడు శ్రీ రాహుల్‌గాంధీ ‘పిల్లి కునుకు’ తీస్తూ దొరికిపోయాడు. దానిమీద కాంగ్రెస్ పార్టీలోని పెద్దలెందరో రకరకాల సంజాయిషీలు యిస్తున్నారు. కొందరు ఆయన ‘నిద్రపోలేదు’అన్నారు. కానీ, చాలామంది రాహుల్‌గాంధీ- నిదురమ్మ ఒడిలోకి తెలియకుండానే జారుకున్నాడనే అంగీకరించారు.
‘పిల్లి కళ్లు మూసుకుని పాలు త్రాగుతూంటే’-అన్నట్లు ఒక ఎం.పీ.- అందులోకీ, ‘రేపటి ప్రధానమంత్రి’అవుతాడు అని ఊహాగానాలు చేసుకుంటున్న తరుణంలో- రాహుల్‌గాంధీ కునుకు- చినికి చినికి గాలివాన అయింది.
‘‘అఫ్‌కోర్స్! అది ‘టీ కప్పు’లో తుఫాను లాంటిదే అనుకోండి’’- అన్నాడో కాంగ్రెస్ పార్టీ అభిమాని. ఐతే, రామాయణంలో పిడకల వేట లాగా- అంత ముఖ్యమైన అంశంమీద కాంగ్రెస్ పార్టీయే ప్రభుత్వాన్ని నిలదీస్తున్న సమయంలో సదరు పార్టీ యువరాజు అలా ‘కునకడం’ చాలామంది అన్యపార్టీల వారికి కినుక కలిగించింది. ‘దొరికిందో అవకాశం- ఓ పట్టుపడదాం’- అనుకున్నారు. ఇవి ఇంటర్‌నెట్ రోజులు! సి.సి.కేమెరాల రోజులు. పైగా పార్లమెంటు సమావేశాలని ప్రత్యక్ష పురాణంగా సకల ప్రపంచానికీ చూపెడుతున్న రోజులు. నిజానికి రా.గా.- రెండేళ్ల క్రితం ఓసారి యిటువంటి నిద్రావస్థలోకి జారుకున్న వైనం వెలుగుచూసింది. కానీ, యిప్పటి పరిస్థితులు వేరు. ప్రక్కనే కాం.పా. లోక్‌సభ నాయకుడు మల్లిఖార్జున ఖర్గే అధికార పార్టీమీద నిప్పులు చెరుగుతున్నాడు. మనకి కనబడుతున్న దృశ్యంలో రా.గా ప్రక్కన మల్లిఖార్జున్‌గారు లేకపోతే, అసలు రా.గా. కునుకు- అన్ నోటీస్డ్‌గానే వుండిపోయేది. ఇంతకీ రుూ ‘లక్ష్మణమూర్తి చిరునవ్వులాంటిదాని అంతరార్ధం?- అందరూ ఎవరిశక్తికొద్దీ వాళ్లు వ్యాఖ్యానించుకోడమేగానీ- రాహుల్‌జీ మాత్రం ఏమీ చెప్పడం లేదు. రాములవారి పట్ట్భాషేకం కాలంలో- లక్ష్మణుడికి పధ్నాలుగేళ్లు అడవి బ్రతుకులో నిద్రలేకపోడంతో- చిన్న పిసరు కునుకు వచ్చిందిట. ‘‘ఇదేనా సమయం? డామ్‌ఫూల్!’’అంటూ, నిద్దుర లక్ష్మిమీద రామ సోదరుడు- ఐరానికల్‌గా ఓ చిర్నవ్వు చిందించాడు కానీ రాముడు అపార్థం చేసుకున్నాడు. పుచ్చకాయల దొంగ ఎవరు అంటే భుజాలు తడుముకున్నట్లు- యిక్కడ రాహుల్‌గాంధీ కూడా యిప్పుడా? నిద్రాదేవీ, నువ్వు నన్ను పట్టుకునేది’’ - అంటూ ముందే జాగ్రత్తపడి, ఒక్క ఆవలింతతో మేల్కొని వుంటే సోషల్ మీడియాకి యింత కాలక్షేపం ప్రతిపక్షాలకి యింత అవకాశం దొరికేవి కావు. అయితే రేణుకాచౌధురీగారి లాంటి అట్టహాసం నాయకులున్న కాంగ్రెస్ పార్టీ అది. ఆమె రాహుల్‌గాంధీ నిద్రపోయాడనే ఒప్పేసుకుంది. ‘‘అసలు యింతకీ తాను కునుకుతున్నానా? లేక ఉద్వేగంలో తూగేనా?’’అన్నది రా.గా.యే తేల్చుకోలేకపోతున్న తరుణంలో- ‘‘అవతల ‘హీట్’(వానాకాలంలో) దంచేస్తూంటే లోపల పార్లమెంటు చల్లదనంలోకి రాంగానే ఎలా వుంటుంది? ఓసారి కన్నులు మూతపడవా?’’అన్నదామె. మరోసారి ‘‘రాహుల్‌గాంధీకి అంత గోలలో నిద్దుర ఎలా పడుతుంది?’’ అనడిగింది- ఏమో మరి! కాని రుూ నిద్రని కేమెరా పట్టుకుంది. అయినా కాంగ్రెస్ పార్టీ నాయకులు తేలుకుట్టిన దొంగల్లాగా వూరుకుని- ‘‘లేదండీ! ఆయన కనులు మూసుకుని ఏకాగ్రతతో వింటున్నాడు ఇంతకన్నా ముఖ్యమైన సమస్యలు కూడా చినబాబుని ఎన్నో కలచి వేస్తున్నాయి- కనుక అలా కనులు మూసుకున్నాడు. కానీ, చెవులు ‘తెరిచే వున్నాయి’అనొచ్చునా? కాదు. మీ మోదీగారు మాత్రం లోగడ అంబేద్కర్ మీద చర్చ జరుగుతూ వుండగా కునుకు తియ్యలేదా?’’అంటూ ఎదురు దాడికి పూనుకోడంతో మన చినబాబు అడకత్తెరలో పోకచెక్కలాగా దొరికిపోయాడు.
ప్రతిపక్షాలలో మాయావతి పార్టీ మరీ గట్టిగా పట్టుకుంది. ‘‘అసలు దళితుల మీద మమకారం, బాధ్యతా వున్నాయా? నీకు- వుంటే- నిద్ర ఎలా వస్తుందయ్యా?’’ అన్నది.
పాపం! కాం.పా.- ఉ.పా.- ‘రాగా’ ఆ మర్నాడే పూనా వెళ్లి తీవ్ర నష్టానికీ, మనస్తాపానికీ గురైన కుటుంబాలను పరామర్శించాడు. కానీ లక్ష్మణదేవర చిరునవ్వులాగా- రా.గా. కునుకు- కాం.పా.పార్టీని నవ్వుల పాల్జేసింది- (అకటా! విధి క్రూరము కదా!)
వెబ్‌సైట్లన్నింటా యిదే దృశ్యం. సోషల్ మీడియా ము ఖ్యంగా ట్విటర్ డాట్‌కామ్‌లో కుప్పలు కుప్పలుగా ‘‘ట్వీట్స్’’-
పాపం! నాయనమ్మ పోలికలు రాని రుూ యువరత్నాన్ని ఆటపట్టించేస్తున్నాయి- ‘రాగా సోతా హైతో, ‘జగ్’‘జాగ్‌తాహై’ (రాహుల్ నిద్రపోతూంటే జగమంతా (నివ్వెరపాటుతో) లేచి కూర్చుంది) అంటూ! లోకం కోడై కూసింది!
-నిజానికి ‘తల్లి పోలికలువస్తే కొడుకుకి- అదృ ష్టం’అంటారు గానీ- శ్రీమతి సోనియాగాంధీని అన్నివిధాలా- పోలిన రా.గా.కి - గడుసుదనం, మాటకారితనం ఎలా వస్తుంది? దిగ్విజయ్‌సింగ్ లాంటి వాళ్లను రాసి యివ్వమన్నా నిలువునా ముంచేస్తారు.
‘‘సోజా రాజకుమారా! సోజా!’’అంటే- నిద్రపోరా, రాజకుమారా! నిద్రపో! నిద్రలోనా, ప్రధానమంత్రి కావాలన్న కలలు కనరా!’’అని ఎద్దేవా-
‘‘రాహుల్‌జీకి నిద్ర ఎందుకొస్తుందీ అంటే- లెక్కల క్లాసులో, అర్ధంకాకపోతే, నాకూ అదే వచ్చేది’’అంటూ ఓ తుంటరి జోకు (ట్వీటు) అయితే పార్లమెంటులో హేమాహేమీలు ఓ కునుకు తీయడం- అసెంబ్లీలో పోర్న్ వెబ్‌సైట్లు వీక్షించడం లాంటివి పవిత్ర భారతీయులకు కొత్త ఏమీ కాదు గానీ- ఆరోజులు వేరు.! ప్రత్యక్ష ప్రసారాల రోజులివి. కాకపోతే ‘రాగా’ని పీడిస్తున్న సమస్య వేరే ఒక్కటుంది. అదే సుప్రీంకోర్టు కేసు జడ్జీలు యిచ్చిన ఆదేశం. -అప్పాలజీ యిస్తావా? విచారణ బోనులోకి వస్తావా?’’ అనడిగిందిగా?
‘‘గాంధీగార్ని ఆర్.ఎస్.ఎస్.వాళ్లే చంపేశారు’’ అంటే వాళ్లూరుకుంటారా?
అలా వూరుకుంటే వాళ్ల ‘ఆబోరు’దక్కుద్దా? జనాల్లో... పరువు నష్టం దావా కొట్టరుగా? అందుకనే.
కాగా, కాం.పా. లీగల్ పండిట్స్- ‘‘నో అపాలజీ రాహుల్. కేసు ఫైట్ చేద్దాం’’ అంటున్నారు. ఒక ‘సారీ’చెబితే చినబాబు బయటపడిపోతాడు గానీ- అలా జరిగితే ‘‘వాళ్ల’’పరువుపోదూ? జనాలముందు? ఈ కేసు రాహుల్‌ని నిజంగానే దీర్ఘాలోచనలోకి- వాళ్లెవరో అన్నట్లు- ‘‘యోగ నిద్రావస్థ’’లోకి దిగజార్జి వుంటుంది’’- అంటున్నారు.
వెల్ విషర్స్! లోకులు పలు ‘‘జోకులు’’కదా?
అందుకే అంటారు-‘కాలుజారినా తీసుకోవచ్చును గానీ, నోరుజారితే వెనక్కి లాక్కోలేం’-అని. ఏదిఏమైనా రాహుల్‌గాంధీకి మంచి ‘‘ప్రయివేటు మాస్టారు’’అవసరం. లేదా జనాలు ‘‘ప్రయివేటు చెప్పేస్తా’’రు యిలాగే!
హీ రిక్వయిర్స్ ఏ గుడ్ ట్యూషన్ టీచర్!