కోడుమూరు, నవంబర్ 19:మండల పరిధిలోని క్రిష్ణాపురం గ్రామ సమీపంలో ఉన్న జీడీపీ కాల్వలో ప్రమాదవశాత్తూ పడి ఆదివారం సాయంత్రం హరిజన జాను(3) మృతిచెందాడు. ఈ విషయం తెలియక రాత్రి పొద్దుపోయే సమయంలో పిల్లవాడు కనిపించడం లేదని తల్లీదండ్రులు హరిజన దుబ్బన్న, సోని గ్రామంలో పలుచోట్ల వెతికినా ఆచూకీ లభించలేదు. సోమవారం ఉదయం కాల్వలో తేలిన జాను మృతదేహం చూసి తల్లిదండ్రులు బోరున విలపించారు.

పాలకొల్లు, నవంబర్ 19: క్షీరారామలింగేశ్వర స్వామి ఆలయ ఉప ప్రధాన అర్చకుడు కోట నాగ వెంకట వరప్రసాద్ (నాగబాబు) మృతికి పలువురు తీవ్ర సంతాపం వ్యక్తంచేశారు. కార్తీక సోమవారం ఉదయం ఆలయంలో పూజలు నిర్వహిస్తూ గుండెపోటుతో కుప్పకూలిపోయిన నాగబాబును ఆసుపత్రికి తరలించగా మృతిచెందినట్టు ప్రకటించారు. చాలకాలంగా ఆలయంలో అర్చకులుగా నాగబాబు అందరికీ సుపరిచితులు కావడంతో ఆయన మృతి పట్ల భక్తులు విచారం వ్యక్తం చేశారు.

గోకవరం, నవంబర్ 19: అత్తను అత్యంత దారుణంగా కత్తితో నరికి చంపిన సంఘటన సోమవారం మండలంలోని కొత్తపల్లి గ్రామంలో తీవ్ర కలకలాన్ని రేకెత్తించింది. ఆ గ్రామస్థులు, పోలీసులు తెలిపిన వివరాల ప్రకారం..మండలంలోని కొత్తపల్లి గ్రామానికి చెందిన బొరి చంటమ్మ (65)ను ఆమె అల్లుడు ప్రత్తిపాడు మండలం ధర్మవరం గ్రామానికి చెందిన జాజిమొగ్గల దుర్గాప్రసాద్ కత్తితో కొత్తపల్లి గ్రామం చాకలిపేటలో విచక్షణా రహితంగా నరికి హతమార్చాడు.

నూజివీడు : నూజివీడు సబ్ రిజిస్ట్రార్ కార్యాలయంపై అవినీతి నిరోధక శాఖ అధికారులు సోమవారం సాయంత్రం దాడులు నిర్వహించారు. దస్తావేజు లేఖర్లు, కార్యాలయం సిబ్బంది వద్ద ఉన్న 47,500 రూపాయలను స్వాధీనం చేసుకున్నారు. రిజిస్ట్రార్ కార్యాలయంలో రికార్డులను ఏసీబీ అధికారులు తనిఖీలు చేశారు. సాయంత్రం నాలుగు గంటలకు ప్రారంభమైన తనిఖీలు రాత్రి వరకు కొనసాగాయి.