న్యూఢిల్లీ, మార్చి 8: ఐఎన్‌ఎక్స్ మీడియా మనీలాండరింగ్ కేసులో తాత్కాలిక ఉపశమనం కోసం కాంగ్రెస్ సీనియర్ నేత పి చిదంబరం కుమారుడు కార్తీ చిదంబరం గురువారం సుప్రీం కోర్టును ఆశ్రయించారు. కార్తీ పిటిషన్‌ను విచారించిన సుప్రీం కోర్టు ప్రధాన న్యాయమూర్తి దీపక్‌మిశ్రా సారధ్యంలోని ధర్మాసనం ఢిల్లీ హైకోర్టుకు వెళ్లాలని కార్తీని ఆదేశించింది. కార్తీ పిటిషన్ విచారించడానికి సమయం కేటాయించాలని సుప్రీం సూచించింది.

కరీంనగర్ రూరల్, మార్చి 8: ఏడాది చిన్నారితో ఒక తల్లి బావిలోకి దూకి ఆత్మహత్య చేసుకుంది. కొత్తపల్లి మండలంలోని నాగులమల్యాల గ్రామానికి చెందిన తీగల మాధవి (28) అనే మహిళ తన చిన్న కూతురు యశశ్వినితో(1) కలిసి బావుపేట శివారులోని వ్యవసాయ బావి లో దూకి ఆత్మహత్య చేసుకుందని గురువారం కరీంనగర్ రూర ల్ సీఐ శశిధర్ రెడ్డి తెలిపారు.

కదిరి టౌన్, మార్చి 8: అనంతపురం జిల్లాలో గురువారం జరిగిన రోడ్డు ప్రమాదంలో ఇద్దరు డ్రైవర్లు మృతి చెందారు. అదుపుతప్పిన ఆర్టీసీ బస్సు చెరువుకట్ట వద్ద బోల్తా పడడంతో అందులో ప్రయాణిస్తున్న ఆర్టీసీ డ్రైవర్లు గంగాధర్ (43), కేటీ కిషోర్‌కుమార్ (42) మృతి చెందారు. కదిరి డిపో ఆర్టీసీ బస్సు ప్రయాణికులతో రాయచోటికి వెళ్తుండగా రూరల్ మండలంలోని విఠలరాయుని చెరువు వద్ద అదుపుతప్పి బోల్తా పడింది.

హైదరాబాద్, మార్చి 8: ఒక ప్రైవేటు ఫిర్యాదు కేసులో తనపై హత్య కేసును బనాయిస్తూ కర్నూలు జిల్లా డోన్ జూనియర్ ఫస్ట్ క్లాస్ మెజిస్ట్రేట్ కోర్టు జారీ చేసిన ఉత్తర్వులను సవాలు చేస్తూ ఆంధ్ర ప్రభుత్వ ఉప ముఖ్యమంత్రి కెఇ కృష్ణమూర్తి కుమారుడు కెఇ శ్యాంబాబు హైకోర్టులో పిటిషన్ దాఖలు చేశారు. ఈ ప్రైవేట్ ఫిర్యాదును వైకాపా నేత శ్రీదేవి కోర్టులో దాఖలు చేశారు.